P-Noy misubo sa MV Tenshu Maru

CEBU, Philippines - Gidasig ni Pangulong Benigno ‘Simeon’ Aquino III ang mga Sugbuanon nga magtinabangay aron maangkon ang gitinguhang kalamboan sa nasud.

Si Aquino nga mibisita sa Sugbo maoy nangulo sa gihimong ceremonial cutting of ribbon sa pagbukas kagahapon sa buntag sa Radisson Blu sa Show Mart (SM) sa reclamation area, dakbayan sa Sugbo.

Maoy kuyog ni Aquino sa pagtambong sa maong kalihokan sila si Department of Energy (DoE) Secretary Rene Almendras, Secretary Cesar Purisima sa DOT ug uban pa.

Ang tag-iya sa Radisson Blu nga si Henry Sy ug Felicidad Sy, Cebu Mayor Michael Rama, Cebu City South District Kong. Tomas Osmeña ug mga magpapatigayon ang misugat sa pangulo.

Matud pa ni Aquino nga naningkamot karon ang iyang administrasyon sa paghimo og mga kausaban alang sa gitinguha niyang kalamboan sa nasud ug katawhan.

Dugang pa niya nga naglakip sa mga kausaban nga iyang gihimo mao ang pagwagtang sa pagpangawkaw nga maoy hinungdan nga iyang gitukod ang Truth Commission nga nagsugod na sa ilang gimbuhaton ubos sa pagpangulo sa usa ka Sugboanon nga si kanhi Chief Justice Hilario Davide Jr.

Sa ambush interview sa mga tigbalita iyang giangkon nga nadawat na niya ang mga girekomendar nga maoy mangulo sa Regional Development Council (RDC) sa Central Visayas apan wala pa kini niya kahatagi og pagtagad tungod sa daghan kaayong gimbuhaton sa iyang buhatan niining panahona.

Ang mga nominado sa maong pwesto mao sila si Gov. Orlando Fua Jr. sa Siquijor; Gov. Agustin Perdices sa Negros Oriental ug Gov. Edgardo Chatto sa Bohol; Gov. Gwendolyn Garcia ug Cebu City Mayor Michael Rama.

Lakip sa gi-nominate nagagikan sa pribadong sektor nga sila si Jose Ng sa Cebu Chamber of Commerce and Industry; Argeo Melisimo, presidente sa First Consolidated Bank sa Bohol.

Una pa miadto sa SM si Aquino miadto kini sa Tsuneishi Heavy Industries Cebu Inc.(THICI) sa Balamban ug ‘mibunyag’ sa 180,000 dead weight tonnage nga bulk carrier sa pangalang ‘MV Tenshu Maru.’

Human sa usa ka Japanese ceremony si Aquino maoy miputol sa pisi sa maong barko nga nagsimbolo sa pagbuhi niini ngadto na sa labing una niining paglawig sa kadagatan.  - Romeo Limpangog, Rey Pasaporte ug Ryss Marie Cabando (BANAT NEWS)