Administrasyon ug oposisyon sa Talisay pulos lig-on

CEBU, Philippines - Ang grupo sa administrasyon ug oposisyon sa dakbayan sa Talisay pulos nangangkon nga lig-on ang ilang mga kaalyadong kapitan sa barangay nga maoy makalingkod isip presidente sa Association of Barangay Captain lakip na ang mahimong chairman sa Sangguniang Kabataan (SK).

Si Talisay City Administrator Richel Bacaltos nga nahinabi sa Banat News kagahapon nagkanayon nga lig-on ang grupo sa administrasyon ug majority ang gidaghanon sa kapitan nga ilang kaalyado apan wala niya ibutyag ang gidaghanon sa maong mga kapitan.

Ang Talisay gilangkuban sa 22 ka mga barangay. Matud ni Bacaltos nga sa milabay’ng semana nagpahigayon na sila og meeting kabahin sa ilang idusong mahimong presidente sa ABC apan sa pagkakaron wala pa nila ma-finalize kung kinsa ang ilahang pili-on.

Karong Nobiyembre 30, 2010 ang paglingkod sa mga bag-ong napiling kapitan sa barangay. Sa unang semana sa Disyembre ang administrasyon may ituboy nang presidente sa ABC ug SK.

Si Bacaltos midugang nga kampanti sila nga ang ilahang kaalyado maoy mapili sa nahisgutang mga posisyon.

Si Konsehal Romeo Villarante sa oposisyon nga nahinabi sa mga tigbalita   nagkanayon nga sobra na sa napulo ang ilang kaalyadong kapitan ug lig-on kaayo ang ilang grupo ug naglaom usab sila nga ilang kaalyado ang kapitan nga mapiling presidente sa ABC lakip na sa SK. Matud ni Villarante nga duna silay pili-ong tulo ka mga kapitan ug tulo usab ka mga SK aron dunay alternatibo.

Ug kung kinsa sa mga kapitan o SK ang makakuha sa mayoriya adto nila ipabuhagay ang ilang mga resources.

Apan wala pa usab ibutyag ni Villarante ang mga ngalan sa ituboy nilang mga kapitan ug SK. – BANAT NEWS