CEBU, Philippines - Usa ka empleyado sa MEPZ kinsa gidudahang gitulis ug gipusil, napalgang patay na didto sa Sitio Ibabao Brgy. Agus dakbayan sa Lapulapu sa milabay’ng gabii.
Ang biktima mao si Roldan Pagobo, 28, minyo, nga taga Sitio Malingin Brgy. Punta Engano dakbayan sa Lapulapu, ug usa ka empleyado sa MEPZ.
Sumala sa kapolisan sa Lapulapu nga sa mga alas 8:20 sa milabay’ng gabii nabati sa mga molupyo sa maong lugar ang boto sa armas de fuego ug ilang nakita si Pagobo nga nagkadugo na ug adunay samad pinusilan.
Ila kining gidala sa tambalanan apan gideklarar kini nga patay na sa pag-abot didto
Gipangita pa sa kapolisan ang mga kriminal.
Samtang sa laing bahin usa ka ex-convict nabulit sa mga samad pinusilan ang lawas ug napalgan usab nga patay na sa mga molupyo didto sa barangay Catolohan, lungsod sa Dalaguete sa miaging buntag.
Siya si Nicolas Belda, 48, ulitawo nga taga barangay Nalhug, sa mao gihapong lungsod.
Gipangita pa usab sa kapolisan ang kriminal. - Bong Soriano, Romeo Limpangog ug Rey Pasaporte (BANAT NEWS)