Rama vs. Osmeña sa 2013 napanglantawan

CEBU, Philippines - Gipadayag sa kapitan sa barangay Punta Princesa nga si Joe Navarro nga tataw nga masubli ang nahitabo kaniadto tali nila ni kanhi mayor ug karon Kong. Tomas Osmeña ug kanhi bise mayor niini nga si Alvin Garcia sa nahitabo karong panagsungi ni Osmeña ug ni Mayor Michael Rama sa 2013 nga eleksyon.

Nagkanayon si Navarro nga sakop sa oposisyon dili layong masubli ang nahitabo niadtong 2001 diin si Garcia nga maoy bise mayor kaniadto ni Osmeña nakig-atbang sa naulahi pagkamayor.

“Sa akong tan-aw, murag magkaatbang gyud nang duha karong 2013, kay klaro man gyud kaayo nga modagan na pagbalik pagka-mayor si Tomas (Osmeña),” sumala pa ni Navarro sa Banat News.

Kahinumduman nga nadismaya si Osmeña sa pipila ka mga gipangbuhat ni Rama nga iyang gihulagway nga milapas na sa baruganan nila sa Bando Osmeña Pundok Kauswagan (BOPK) nga ilang partido.

Wala mahimuot ang kongresista sa pagdumala ni Rama sama sa pagpahigayon og mass oathtaking diha sa Cebu City Hall sa tanang mga nakadaug nga opisyales sa kabarangayan, apil niini ang taga oposisyon.

Apan depensa pa ni Navarro nga siya mismo ang mi-boluntaryo nga adto manumpa ni Rama gumikan kay misalig siya sa liderato niini.

“Nituo man gud ko sa administrasyon ni Rama, busa para nako dili gyud angayan tagaan og malisya kung adto mi manumpa sa iyang atubangan,” nagkanayon si Navarro.

Ang usa sa mga kaalyado sa BOPK nga si Kapitan Pancho Ramirez sa barangay Sto. Niño kinsa dili buot mokomento sa nahitabo tali ni Rama ug Osmeña nanghinaut nga masulbad ra kini.

Samtang ang inilang taga oposisyon nga si Kapitan Jerry Guardo sa Sambag 1 mipasabot nga makapaabot og suporta ang administrasyon ni Rama kaniya gumikan sa pasalig niini nga patas ang pagserbisyo niini ngadto sa mga barangay bisan unsa pa nga partido.

Si Rama nagdumili paghatag og pamahayag aron dili na modako ang isyu apan iyang gipasalig nga magpabilin ang paghatag niya og serbisyo ngadto sa tanang barangay.  – BANAT NEWS