Nanghayhay nakuryentihan

CEBU, Philippines - Patay ang 60-anyos nga lola human aksidenteng nakuryentihan samtang nanghayhay sa iyang linabhan sa alambre nga hayhayan nga midapat sa paksit nga linya sa kuryente sa Cebu Electric Cooperative (CEBECO-2) diha sa sitio Kanangkaan barangay Korte lungsod sa Carmen niadtong alas 6:30 sa milabay’ng buntag.

Ang biktima mao si Emirinciana Cando, 60, molupyo sa nahisgutang lugar.

Matud pa ni SPO2 Simplicio Gibo sa Carmen Police dihang nahinabi sa Banat News subay sa imbestigasyon nga wala mabantaying misagyad ang linya sa kuryente gikan sa poste paingon sa pinuy-anan sa iyang silingan nga si Alejandro Pasana.

Dihang gihayhay na sa biktima ang basa nga linabhan kalit kining nakuryentihan ug nakit-an nalang sa mga silingan nga nagkirigkirig kini hinungdan nga dali dayun nilang gitabang.

Gisuwayan pa unta og hatud sa Danao City District Hospital ang biktima apan gideklarar kini sa mga doktor nga dead on arrival.

Samtang ang lineman sa CEBECO-2 nga si Roy Precillas, 34, mao nay mi-report ug mipa-blotter sa aksidente diha sa kapulisan.

Subay sa pagsukit-sukit sa kapulisan gitug-an sa lineman nga posibleng dunay napaksit nga wire gikan sa poste paingon sa pinuy-anan ni Cando nga nagyungyong ug nasagyad sa hayhayan. – BANAT NEWS