1 patay, 8 naangol

CEBU, Philippines - Usa patay samtang walo ang samaran sa pagbag-id sa usa ka van ug usa ka 10-wheeler nga trak una pa masampak sa usa ka poste sa kuryente pasado alas-3 sa hapon sa may national highway sa sitio Balinga Barangay Flores lungsod sa Catmon.

Ang namatay mao si Teresita Orlanes, 80, samtang ang samaran mao iyang mga kabanay nga sila Marilyn Coloscos, 52, Jennifer Orlanes, Kyr Orlanes 5, Francis Paul Brehente, 8, Samuel Brehente, 58, Ester Coloscos, 69, Renato Doña, 60, ug Mateo Abatayo Jr., 38.

Base sa imbestigasyon sa kapolisan sa lungsod sa Catmon nasayran nga ang mga biktima sakay sa usa ka Nissan Vanette nga adunay plakang GEP-222 nga gimaneho ni Abatayo patubang na unta sa barangay Poblacion sa maong lungsod.

Samtang ang drayber sa 10-wheeler truck nga delivery truck sa B-MEG nga nagtangag sa plakang GXH-633 gimaneho ni Archival Delfin Englatera, 48, molupyo sa barangay Talamban.

Ang maong trak padulong sa habagatan dihang gikatagbo ang maong van ug nagkasaghiray hinungdan nga nawad-an og kontrol ang drayber sa van ug adto nasampak sa poste sa kuryente.

Ang mga biktima daling gidala sa Catmon district hospital apan gideklarar na nga dead on arrival ang 80-anyos nga ginang.

Sa pakighinabi sa Banat News ni SPO4 Rex Menchavez mibutyag kini nga ang sakay sa maong van pulos kaliwat ug pipila ka silingan diin gikan kini sa barangay Makaas kay mitambong og bunyag.

Matud pa ni Menchavez nga ang 10-wheeler truck base sa ilang imbestigasyon giingong mitipas sa lane sa maong van hinungdan sa panagsaghiray. (BANATNEWS)