Brgy. kap sa Subangdaku gituboy ni Cortes sa ABC

CEBU, Philippines - Gituboy ni Mandaue City Mayor Jonas Cortes ang barangay kapitan nga si Ernie Manatad sa Subangdaku sa pagka-presidente sa Association of Barangay Council (ABC).

Sa pamahayag niya sa pagpakighinabi sa mga tigbalita iya hinuong gipasabot nga ang tanan nga midaug nga 27 ka mga barangay kapitan sa miaging piniliay pulos haom sa paghupot sa maong katungdanan.

Ang mapili nga ABC federation president maoy mohulip kang outgoing ABC federation president Jovita Tuela Joy Ouano kinsa anaa na sa iyang katapusang termino isip barangay kapitan sa Opao ug midaug usab nga barangay konsehal sa miaging piniliay.

Nunot niini si Cortes mitataw nga alang kaniya nga naa kang Manatad ang mga gipangita niya sa usa ka lider ug nasinati na niya kini kabahin sa trabaho isip kaniadto iyang sinaligan sukad pa niadtong konsehal pa ang mayor sa dakbayan ug hangtod nga nahimo niya kining executive secretary dihang na mayor si Cortes.

Dugang pa niya nga gawas kang Manatad ang laing barangay kapitan nga haum usab sa maong katungdanan isip ABC president mao sila si Carmilino Delmar Jr., sa Ibabao Estancia, Mario Bihag sa barangay Tingob, Damaso Tumulak sa barangay Labogon ug Andres Suson sa barangay Pagsabungan.

Gipasabot ni Cortes nga ang pagpili og mahimong ABC federation president ang nagkanihanglan gyud og hiniusang pag-uyon gikan sa mga kauban nga barangay kapitan ug kini matigayon pinaagi sa maayong pagsinabtanay.

Ang Mandaue walay lig-ong oposisyon karon gumikan kay pipila sa mga barangay nga ang mga kapitan dili kaalyado ni Cortes ang nangaparot sa milabay’ng piniliay. (BANATNEWS)