Sikyu, US citizen nadunggaban

CEBU, Philippines - Samaran ang usa ka gwardiya human kini giunay og dunggab sa iyang silingan pasado alas-8 sa miaging gabii sa sitio Kawayan barangay Poblacion Pardo, samtang usa ka Filipino-American ang naangol usab human kini dunggaba sa iyang igsuon.

Ang gwardiyang nadunggaban giilang si Erwin Cabasag, 24, usa ka gwardiya sa Alta Vista Golf Course ug konektado kini sa Equador Security Agency.

Samtang ang suspetsado nailhan usab nga si Joey Caduyac, molupyo usab sa maong lugar kinsa giingong nasuko tungod kay wala baligyai og ginamit nga golf balls sa biktima gikan sa gitrabahoan niini.

Base sa imbestigasyon sa kapolisan nasayran nga ang biktima nagkalingaw og duwa og basketbol sa gipahigayon nga liga sa ilang dapit ug dihang kini gipulihan milingkod kini sa ilang bangko uban sa mga kauban.

Apan kalit lang miabot ang suspek dayong dunggab sa biktima diha sa walang bahin sa dughan ug ang suspek daling mikaratel og dagan hinungdan nga gigukod kini sa biktima ug mga tawo. Ang biktima daling gidala sa Cebu City Medical Center samtang ang suspek wala na maabti pa sa kapolisan.

Sa laing bahin, samaran ang usa ka US citizen nga si Joel Velasquez, 49, human kini gi-unay og dunggab sa tiyan sa iyang manghod nga si Patricio nga usa usab ka US immigrant pasado alas-12 sa kaadlawon kagahapon sa sitio Candarong barangay Pulangbato ning dakbayan.

Matud pa sa kapolisan nga base sa ilang nasagap nga mga impormasyon sa kasina maoy usa sa mga hinungdan sa away sa duha. (BANATNEWS)