Tanod padung hearing sa brgy. gipusil patay

CEBU, Philippines - Patay ang usa ka barangay tanod human mapusili sa usa ka lalaki pasado alas-10 sa buntag kagahapon sa barangay upper Panadtaran lungsod sa San Fernando.

Ang biktima nailhan nga si Ricardo Guia,38, molupyo sa maong lugar kinsa nakaangkon kini og samad pinusilan sa iyang agtang ug sa lawas, samtang ang gipasanginlang mipusil kaniya mao si Dante Jerome Tangub, 40, molupyo sa Center Tunggo sa maong lungsod ug usa ka “kuyme-kuyme” sa buwangan.

Base sa inisyal nga imbestigasyon sa kapolisan nasayran nga sa wala pa mahitabo ang maong insidente ang biktima nagbarog daplin sa karsada paatubang sa barangay hall aron motambong sa barangay hearing kalabot sa alegasyon sa suspek batok sa kapitan nga ‘gibulsa’ niini ang igbalayad sa kuryente.

Apan sa kalit lang mipatim-aw ang suspetsado ug sa walay igong hinungdan bitbit ang iyang armas nga kalibre .45 midiretso og pabuto ngadto sa biktima.

Ang biktima gidala sa South General Hospital apan pipila ka oras ang milabay nakabsan na gyud kini sa iyang kinabuhi samtang ang suspetsado misutoy usab og dagan palayo sa maong lugar.

Sa pakighinabi sa Banat News ni PO1 Miguel Bernabe sa San Fernando Police Station mibutyag kini nga ang suspetsado ‘nangomedya’ sa biktima nga maong naputlan og kuryente ang barangay tungod kay gibulsa sa ilang kapitan nga si Catalino Baysa ang igbalayad alang niini.

Ang tubig sa barangay migamit og water pump motor nga gamitan og kuryente. Tungod sa maong komedya gisumbong sa biktima ang suspek ngadto sa kapitan hinungdan nga gipadad-an og subpoena ang suspek aron patambungon sa barangay kabahin sa alegasyon niini.

Apan giingong nasuko ang suspek ngadto sa biktima ug kagahapon gikatakda untang husayon ang pasangil sa suspek ngadto sa kapitan apan gipusil na hinuon sa suspek si Guia.

Matod pa ni Bernabe nga posibleng nahadlok ang suspetsado sa ipahigayon nga hearing tali nilang duha sa biktima tungod sa iyang gihimong binuang hinungdan sa pagpusil niini sa biktima. (BANATNEWS)