1 sa 2 ka tulisan tiklo

CEBU, Philippines - Nadakpan sa kapolisan sa lungsod sa Consolacion ang usa sa duha ka mga tulisang misakiyo og P14 mil gikan sa   upat ka mga tawo nga gibiktima nila didto sa barangay Danlag, sa maong lungsod sa miaging gabii.

Ang nadakpan nga nagtingkagol na karon sa bilanggoan mao si Eugenio Pasilang, 32, ulitawo, nga molupyo sa maong dapit.

Ang team nga gipangulohan ni PO2 Jonasque Romero, PO1 Adonis Terania ug mga kauban maoy nakasikop kang Pasilang dihang positibo kining giila sa mga biktima .

Ang mga biktima nga giila ni PO2 Romero mao sila si Josepino Montero, 24, ulitawo, Roy Serando, 15, Clarisa Gallardo, 15 ug Cecile Tikog, 21, nga pulos taga lungsod sa Tuburan.

Matud pa ni PO2 Romero nga nagsakay ang mga biktima sa traysikol nga gimaneho ni Montero paingon sa ilang paryente sa maong dapit dihang ang motorsiklo nga Honda Wave color blue nga nagsunod kanila nga giluwanan sa duha ka mga tulisan   kalit lang mi-over take dayong babag sa dalan.

Nagdali kining nanaog ug miduol ngadto sa mga biktima dayong tion sa armas ug mipahibawong tulis.

Si PO2 Romero miingon nga human kuhai og salapi ang mga biktima nga mibalor og P14 mil ang tanan, ang duha ka tulisan mipabuto sa ilang armas dayong sakay sa ilang motorsiklo ug mipasirit niini pahilayo sa maong lugar.

Unya ang mga biktima misumbong dayon sa kapolisan ug dihang milihok ang mga otoridad nasikop dayon niini si Pasilong, kinsa nagpasilong na karon sa prisohan sa lungsod. (BANATNEWS)