Sanchez para ABC president

CEBU, Philippines - Gi-klaro sa nasubliang kapitan sa barangay Busay Eliodoro “Yody” Sanchez nga usa siya sa mga interesado nga magpapili aron mamahimong mosunod nga presidente sa Association of Barangay Councils (ABC) sa dakbayan sa Sugbo.

Kun molampos siya mohulip siya ni outgoing ABC president ug Guadalupe barangay captain Eugenio “Jingjing” Faelnar.

Si kapitan Sanchez ug ang nasubliang kapitan sa Basak Pardo nga si Dave Tumulak , pulos mga sakop sa media kinsa samang higayon , ug pulos usab gituboy ni Kapitan George Rama sa Basak San Nicolas aron mokandidato sa pagka- presidente sa ABC.

Giangkon hinuon ni Sanchez nga kaduha duhaan pa siya nga mopadayon sa pagpapili sa pagka ABC president tungod kay kun tan-awon niya nga adunay mga dagkong politiko nga mosuporta sa mahimong kaatbang niya sa maong posisyon, hayan nga iatras niya ang iyang tinguha.

“Lisud man sad kaayo kun mopugos ta unya mahibaw-an nimo wa’a tay dag-anan ug mopugos man gani, ako lang usa siguroon ug dili ko magda og kauban, ang ako lang ba at least maka-start ang atong henerasyon sa ABC nga dili ba magawngan sa ubang politiko, kay mahadlok man gud ang ubang mga kapitan mao nga toe the line nalang sila og kinsay ituboy”,dugang asoy ni kapitan Sanchez.

Midugang si Sanchez nga dili lang si Kapitan Rama ang nagtuboy kaniya gumikan kay daghan usab sa iyang mga higalang kapitan sa North ug South district ang nagdasig niya pagpapili pagka presidente atol sa ipahigayong eleksiyon sa liga karong buwan sa Disyembre.

Nasayran nga si Kongresista Tomas Osmeña una nang mituboy nila ni Capitol site barangay captain Manuel Guanzon ug T. Padilla barangay captain Michael Ralota. (BANATNEWS)