2 babaye napunggit 1 tipi

CEBU, Philippines - Duha ka babaye ang nadasmagan og sakyanan sa managlahing takna ug dapit sa dakbayan sa Mandaue, ug lungsod sa Consolacion ,ang usa namatay samtang ang usa naangol.

Ang namatay mao si Mercedes Baclohan, 32, biyuda nga taga barangay Umapad, dakbayan sa Mandaue, samtang si Maria Dique, 23, nga taga Cansaga, lungsod sa Consolacion maoy naangol.

Ang suspetsadong drayber sa taxi nga nakadasmag kang Baclohan nailhan nga si   Eleuterio Emito Lambate, 61, minyo, nga taga dalan Cabantan, barangay Mabolo, dakbayan sa Sugbo.

Ang maong suspetsado mitahan dayon ngadto sa kapolisan human sa hitabo.

Samtang ang drayber sa motorsiklong nakadasmag kang Dique nailhan usab nga si Gerald Bamban, 31, nga taga Consolacion ra usab.

Si PO2 Melvin Llanes sa traffic division sa Mandaue City Police Office (MCPO) nga nahinabi sa Banat News miingon nga gikan sa dakbayan sa Lapulapu ang taxi nga gimaneho ni Lambate ug nagdagan kini subay sa Marcelo Fernan Bridge paingon sa dakbayan sa Mandaue sa miaging gabii.

Sa pag-abot niini sa ubos nga bahin sa United Nations Avenue sa barangay Umapad sa maong dakbayan, ang biktima nga si Baclohan kalit nga milabang sa karsada busa kini nadasmagan.

Gumikan sa kusog nga impact sa maong pagdasmag ang biktima nalamba sa sementadong karsada nga maoy hinungdan sa iyang kamatayon.

Samtang si Dique milabang gihapon sa karsada didto sa dalan AC Cortes Ave. sa barangay Maguikay, sa mao gihapong dakbayan sa miaging kaadlawon.

Tungod kay wala makontrolar ni Bamban ang iyang motor, nasabak gyud ang biktima ug nahagba kini sa karsada   nga maoy hinungdan sa grabi niyang bun-og nga nahiagoman, busa nalandig siya sa tambalanan.

Ang duha ka mga suspetsadong drayber pulos na natanggong sa prisohan sa Mandaue. (BANATNEWS)