Linog nabatyagan sa Cebu

CEBU, Philippines - Gitay-og og linog ang dakbayan sa Sugbo ug ubang mga lugar dinhi sa nasud sayo kagahapon sa kaadlawon samtang kagahapon sayo sa buntag miulbo ang Mt.Bulusan sa Sorsogon ug giisa ang alert level 1 sa palibot niini.

Si Rolando Montanez, science research specialist sa Philippine Volcanology (Phivolcs) dihang nahinabi sa Banat News nagkanayon nga ang maong linog nga mitala og intensity 2 dinhi sa dakbayan sa Sugbo ug nabatyagan alas 12:41 kagahapon sa kaadlawon.

Matud pa ni Montanez ang ubang mga lugar nga apektado sa maong linog mao ang Legaspi City ug ang San Pascual sa Burias Island nga mitala og intensity 5 nga maoy kusog-kusog nga apektadong lugar.

Samtang ang ubang mga lugar nga nakasinati sa maong linog mao ang Masbate sa kusog nga intensity 4 samtang sama sa syudad sa Sugbo ang Roxas City mitala lang og intensity 2.

Kagahapon sa buntag alas-8:11 miulbo ang bulkang Bulusan ug mibugwak og baga nga abo nga gibana-banang misaka sa kalangitan og 600 metros gikan sa baba niini. Base sa nakitang gikusgon sa pagbugwak ang Phivolcs mipahibalong miulbo gyud kini kun “explosion type earthquake” nga may gidugayong 57 segundos.

Ang Philvocs wala mobutyag kun konektado ba ang nabatyagang linog dinhi sa Sugbu ug ubang lugar apan base sa pamahayag sa maong ahensya sa ilang website nakatala sila kagahapon og upat ka volcanic earthquakes una ang kalit nga pag-ulbo sa maong bulkan.

Ang mga volcanologists sa Philvolcs diha sa palibot sa maong bulkan miingon nga unom ngadto sa napulo ka kilometro gikan sa baba sa Mt. Bulusan ang natugpahan sa abo, wala hinuoy natalang nakalas o nasakitan sa maong hitabo.

Ang naapektahang mga barangay mao ang Rangas, Aniog, Cogon ug Juban Proper sa lungsod sa Jubam ug barangay Casiguran Proper sa lungsod sa Casiguran.

Samtang si Montanez miingon nga sukad kagahapon sa udto wala silay nadawat nga report kabahin sa mga namugna nga kadaut epekto sa linog ilabi na niadtong mga lugar nga mitala og intensity 4 ug 5.

Matud ni Montanez susama sa mga milabay’ng linog tectonic ang sinugdanan sa linog kagahapon sa kaadlawon ug ang epicenter nahimutang 36 kilometros sa Southwest of San Pascual didto sa Burias Island. (BANATNEWS)