Fluvial parade gipangandaman na

CEBU, Philippines - Ang fluvial procession sa imahen sa milagrosong Birhen sa Regla nga maoy patron sa dakbayan sa Sugbo nahimo nang kabahin sa mga kalihokan sa tinuig nga pangilin sa dakbayan sa Lapulapu sa matag Nobiyembre 20 sa matag tuig.

Ang maong kalihokan alang karong tuiga nga pangilin gikatakdang pagahimoon karong Nobiyembre 12 apan kini giagad lamang sa maayong kahimtang sa panahon.

Kun magdaut ang panahon hayan nga makanselar ang kalihokan sa fluvial procession ug maoy ihulip ang foot procession nga gipaabot nga kuyogan sa mga debotos sa Birhen alang sa pagbalik sa simbahan sa barangay Poblacion.

Sa miaging panagtigom nga gipahigayon sa organizer sa maong kalihokan gipatambong usab nila ang kadagkoan sa buhatan sa Pagasa Mactan.

Sa nasayran nga ang imahen sa Birhen sa Regla gikan sa iyang simbahan sa barangay Poblacion sa Lapulapu ug pagadad-on ngadto sa   simbahan sa barangay Marigondon diin kini ipahimutang sa tibuok gabii sa Nobiyembre 11. Kini maoy kabahin sa pagpangandam alang sa fluvial procession nga pagahimoon sayo sa buntag nga manukad sa kabaybayonan sa barangay Marigondon.

Ang sakyanan sa kadagatan nga mapuno sa dayan-dayan maoy pagaluwanan sa Birhen ug kuyogan usab kini sa nagkadaiyang sakyanan sa kadagatan.

Kini mamidpid sa kabaybayonan sa Mactan ug molahos na sa Mactan Channel ug mosuong ilawom sa Marcelo Fernan Bridge, 1st Mactan Mandaue Bridge ug modunggo sa Mulle Osmeña aron mobalik na sa simbahan sa barangay Poblacion sa maong dakbayan.  – BANAT NEWS