VECO pahatagon og incentive sa mga kawani

CEBU, Philippines - Ang Trade Union Congress Party (TUCP Partylist) nanawagan karun sa management sa Visayan Electric Company (VECO) nga ipublikar ang rekord sa ilang kinitaan sa milabay’ng tulo ka tuig.

Kini maoy hagit sa TUCP Partylist Representative Raymond Democrito Mendoza ngadto sa Veco ug miawhag nga hatagan ang mga trabahante og gikatawag nga productivity incentives isip pahalipay ug ang pagpatuman sa profit sharing.

“Urge Veco management to provide employees with productivity incentives and strictly apply profit sharing,” pasabot pa ni Mendoza.

Base sa nakuha nga impormasyon sa TUCP base usab sa public records nga ilang nakalap nga ang Aboitiz Power Corporation, nga maoy parent company sa Veco giingong adunay ‘robust increase’ sa ginansya niini kun net income sa unang unom ka bulan ning tuiga 2010 nga 678 porsiyento sa P1.64 bilyones sa miaging tuig gikan sa P12.75 bilyones ning tuiga.

Tungod sa ka dako sa increase sa kita gikwestyon sa TUCP Partylist nganong dili makahatag ang Veco og tukmang benepisyo ngadto sa mga trabahante.

“With these kind of earnings, why can’t the management provide what is due their workers,” pasabot pa ni Mandoza.

Mipahinumdum usab si Mendoza nga gikinahanglan usab unta nga mobarog isip amahan ang Aboitiz Power Corporation ngadto sa VECO nga maoy maggiya niini kun unsay angayan nga buhaton ngadto sa mga empleyado niini.

“Take the role of being a good father of a family. Aboitiz should take care of its workers as they are ones who labour for the company’s success. Veco employees work for the safety, efficiency and reliability of the power supply in Cebu,” hagit pa ni Mendoza. “Core labor standards and fundamental workers rights are inviolable,” dugang pa niya.  – BANAT NEWS