Bugoy-bugoy ug shabu pusher gipusil patay

CEBU, Philippines - Patay nang naabot sa tambalanan ang usa ka giingong bugoy-bugoy human kini gipa-ulanan og mga bala sa duha ka wala hiilhing lalaki didto sa sitio Tambis barangay Poog syudad sa Toledo sa miaging gabii.

Ang biktima nailhan nga si Enrique Eribias, 22, nga taga Poog kinsa nakaangkon og mga samad pinusilan sa nagkadaiyang parti sa iyang lawas.

Base sa inisyal nga imbestigasyon sa kapolisan nasayran nga ang biktima gikang nagpalit og softdrink sa gawas nga bahin sa basketball court apan sa dihang misulod na kini sa basketball court kalit lang gipusil kini sa duha ka criminal.

Ang kapolisan daling mirespondi sa maong insidente ug gidala ang biktima ngadto sa Toledo city Hospital apan gideklarar kini nga dead on arrival.

Ang kapolisan nakapunit og siyam ka kabhang sa bala sa kalibre .45 ug upat ka slug sa maong armas nga gituohang maoy gigamit sa pagpatay sa biktima.

Sa pakighinabi sa Banat News ni Inspector Jorge Makapobre sa Toledo Police mibutyag kini nga wala pa gayud sila karuy kasayuran kun si kinsa ang mga mamumuno apan may gidudahan na sila .

Matud pa ni Makapobre nga base sa ilang nasayran nga usa ka bugoy-bogoy ang maong batan-on sa ilang lugar ug mamaligyaay pa gyud kini og ginadiling drugas , dugang pa niya. Apan ila pang susihon kung tinuod ba ang maong mga pasangil batok sa namatay, matud ni Macapobre. – BANAT NEWS