BIN miabuso na bungkagon ni Buenafe

CEBU, Philippines - Ipatangtang sa hepe sa Cebu City Police Office (CCPO) ang Barangay Intelligence Network (BIN) nga maoy kaabag sa kapulisan dinhi sa dakbayan sulod na sa pipila ka mga katuigan.

Si Sr. Supt. Melvin Ramon Buenafe miingon nga tungod sa daghan niyang nadawat nga reklamo sa mga sakop sa BIN nakahukom siyang tangtangon nalang ug ilisan kini og bag-ong Barangay Peacekeeping Action Team (BPAT).

Gibutyag si Buenafe nga sa miaging pipila na ka semana dunay mireklamo kaniya nga usa ka langyaw nga misakay og taxi ug gipangayoan og kuwarta dungan sa pagpakita sa drayber sa I.D niini nga BIN nga dunay tatak nga POLICE ug mihulga pa kuno nga kung dili mohatag ang langyaw iyang dad-on sa police station.

Gawas pa niini, laing BIN nga si Edgardo Cuizon nga mipusil patay sa usa ka lokal nga aktor nga si Kirk Abella niadtong miaging semana nga nag-shooting sa pelikula diha sa Ibarra St,. sa barangay Parian ning dakbayan.

Samtang laing sakop sa BIN usab dinhi sa dakbayan sa Sugbu ang nadakpan sa mga polis sa Carmen pipila ka bulan na ang nakalabay human kini manulis sa usa ka dalaga ug nasuta nga siya maoy gidudahang responsable sa ubang mga pagpanulis sa maong lugar nga magsakay og motorsiklo.

Matud ni Buenafe ang makasulod lamang sa BPAT mao ra kadtong mga tanod nga iyahang ipaubos sa training ug seminar.

Daghan nang mga BIN ang nangadakpan nga nalambigit sa krimen ug gipangreklamo nga labaw pa sila sa pulis ilabi na kung pakuyogon sila sa mga operasyon o ba kaha checkpoints.

Matud ni Buenafe nga ang mga BPAT mao usab unya kini iyang gamiton sa pagbantay sa Sinulog Marde Gras karung bulan sa Enero sa sunod tuig.

Giklaro niini nga sama sa gihapon ang mga sakop sa BPAT dili niya tugotang makadala-dala og armas sanglit igo raman sila moabag sa kapulisan nga mopatunhay sa kahapsay ug kalinaw dinhi sa dakbayan.

Ang Cebu Provincial Police Office (CPPO) nagpadayon karun sa ilang pagpahigayon og training ug seminar sa mga sakop sa BPAT ug nahimong pilot project niini gihimo sa lungsod sa Daanbantayan duna nay mga sakop sa BPAT ug niadto lang nakalabay’ng kapistahan sa maong lungsod diin gipahigayon ang Haladaya Festival ang mga sakop sa BPAT maoy gitahasan sa pagbantay sa parade route. – BANAT NEWS