Misalbar sa apo patay

CEBU, Philippines - Usa ka 77-anyos nga lola ang nalatayan sa bus pasaheroan dihang iyang gisalbar ang iyang 5-anyos nga apo nga milabang diha sa dalan niadtong Huwebes sa buntag diha sa sitio Mohun, barangay Cambuwang sa lungsod sa Dumanjug.

Ang biktima nga patay diha-diha mao si Severa Pesalbon, 77, molupyo sa nahisgutang lugar samtang ang drayber sa Librando bus nga dunay body number 428 nga nakaligis kaniya mao si Romulo Cañete, molupyo sa sitio Canbun-an sakop sa nahisgutang barangay paryente ra sa biktima.

Matud ni Insp. Rolan Aliser, hepe sa Dumanjug Police dihang nahinabi sa Banat News subay sa imbestigasiyon ang biktima kauban sa iyang lalaki nga apo nga naglakaw daplin sa dalan.

Sumala pa nga mikalit og labang sa karsada ang bata nga wala dayun mabantayi sa biktima hinungdan nga gigukod niya kini.

Apan naatol nga mao pud ang pag-abot sa maong bus gikan amihanan padulong sa habagatan niadtong tungura ug pagkakita sa bata gikabig sa drayber ang manobela palayo sa bata. Wala mabantayi ni Cañete ang biktima nga nagsunod sa bata ug mao iyang napunggit ug giingong nalatayan gyud sa mga ligid sa maong bus gikan sa ulo hangtud sa lawas.

Ang biktima nabangil diha sa panguwahiang ligid ug wala na kini kinabuhi.

Atol sa pagsukit-sukit sa kapulisan sa drayber kinsa mitahan usab dayun human sa hitabo kini mitug-an nga plano pa gyud unta niyang likayan ang biktima apan naapiki na siya gumikan kay maigo niini ang tindahan sa daplin nga adunay daghang mga tawo nga nag-estambay.

Matud ni Aliser wala na mahitsura ang patay’ng lawas sa biktima dihang gikuha sa ilawom sa maong bus.

Ang drayber nga mitahan sab dayun sa kapulisan nakagawas usab dayun kini kagahapon human nakig-areglo kini sa mga kabanay sa biktima nga iyaha ra usab nasuta nga paryente ug mipasalig nga moabaga sa tanang gastuhan samtang gikatahong mihatag og pasiunang bayad ang tagdumala sa Librando Bus og kantidad nga P10 mil.

Samtang usa ka Filipino-Japanese nga si Junichi Kanda Andales, 21, uban ang tulo ka mga higalang sila si Raymund Lopez, 22, Hazel Demsuay,19, ug Rene Rey Pajaron, 20, pulos taga dakbayan sa Sugbu ang nangaangol human madasmag ang gimaneho ni Andales nga awto sa monumento sa barangay Poblacion sa samang lungsod. Ang mga biktima gikan sa Moalboal ug padulong sa dakbayan sa Sugbu. – BANAT NEWS