Milingkod nga konsehal di mao ang gibotaran

CEBU, Philippines - Nasagmuyo ang mga lumulupyo sa barangay Kalunasan human ang gipili nila nga kandidato pagka-konsehal kinsa midaog niadtong Oktobre 25 nga piniliay dili diay mao ang ilang gibotaran panahon sa piniliay.

Matud pa sa usa ka lumolupyo sa maong barangay nga si Susan Lopez nga niadtong piniliay ilang gibotaran si Aldwyn Famador pagka-kagawad.

Apan nasagmuyo siya kay human sa piniliay, ang igsuon diay niini nga si Diocel Famador maoy tinuoray nga midagan sanglit mao kini ang tinuoray nga mi-file og certificates of candidacy sa Comelec.

Matud pa ni Lopez nga panahon sa kampanya wala gyud mosaba si Aldwyn sa tinuoray niya nga status ug gihulagway kining gilingla niini ang mga tawo.

“Nasagmuyo gyud mi og maayo, kay ang among gibotaran si Aldwyn gumikan sa iyang personalidad, unya mura na hinuon niya nga giilad ang mga botante,” matud pa ni Lopez.

 Apan sa habig ni Aldwyn, midepensa kini nga ang iyang igsuon na lang nga si Diocel ang iyang gipa-file og CoC kaniadto gumikan kay dili na siya makaabot sa deadline sanglit naa siya importante nga gilakaw niadtong higayona. 

  Dugang pa ni Aldwyn nga dili siya gustong maguba ang iyang grupo maong wala na lang siya mosaba sa kamatuoran.

Nasayran sa Banat News nga gipalabas ni Aldwyn nga siya maoy midagan, gani ang iyang hulagway maoy naa sa mga campaign materials.

Samtang gipadayag sa election officer sa dakbayan sa Sugbo nga si Marchel Sarno nga magpaabot pa og usa ka tuig ang mga residente sa Kalunasan aron makaduso og petition to recall batok kang Aldwyn.

Gipahimangnoan ni Sarno ang publiko nga sunod sa piniliay nga kinahanglan gyud nga ilhon ang mga magpapili sa ilang barangay.

Sa pagkakaron, si Diocel maoy milingkod isip usa sa mga konsehal sa Kalunasan ug nanumpa na kini sa iyang posisyon kagahapon sa atubangan ni Mayor Michael Rama sa Cebu City Hall.  – BANAT NEWS