Ambulansya nabutha'g ligid nalimbuwad

CEBU, Philippines - Maayong pagkalimbuwad sa usa ka ambulansya human kini mabuthi og ligid samtang kini padulong maghatud og pasyente gikan sa Oslob padulong sa dakbayan sa Sugbu pag-abot diha sa national highway sa barangay Baclaya lungsod sa Boljoon pasado alas 3 kagahapon sa hapon.

Ang drayber sa ambulansya nga si Amancio Silangan nagkanayon nga gikan sila sa lungsod sa Oslob nga adunay kargang pasyente ug laing lima ka tawo dihang nahitabo ang aksidente.

Matud pa sa kapolisan nga kalit lang nga mibuto ang ligid sa luyo sa walang bahin sa maong ambulansya ug nawad-an og kontrol si Silangan tungod sa kapaspas sa iyang pagdagan.

Hinuon swerteng walay naangol sa mga sakay niini ug wala usab madugangi ang problema sa pasyenteng ilaha untang ihatud. Ang pasyente gibalhin nalang og laing ambulansya sa lungsod sa Boljoon aron ihatud sa dakbayan. – BANAT NEWS