Rama ngadto sa midaog: Partido ipadaplin

CEBU, Philippines - Gipahigayon kagahapon ang mass oathtaking sa tanang nakadaug sa nakalabay nga Barangay ug Sangguniang Kabataan elections sa dakbayan sa Sugbu nga gipahigayon sa Cebu City Hall.

Duha ka adlaw ang mass oathtaking alang sa mga nangapili nga opisyales sa 80 ka barangay ug motak-op kini karong adlawa.

Si Mayor Michael Rama maoy mipanumpa sa napiling mga kandidato ug midugang sa pagpasidaan nga kinahanglan ang panaghiusa karong panahona ug magtinabangay alang sa kalamboan sa barangay.

“Kanang partido, dili na kana angay huna-hunaon, angay gyud nga magtinabangay, kay gipili mo sa mga tawo,” mensahe pa ni Rama ngadto sa mga opisyales sa barangay.

Gipasalig usab ni Rama nga patas ang paghatag niya og proyekto ngadto sa barangay bisan pa man sa mga lugar nga giingong sakop sa oposisyon sama sa barangay Punta Princesa nga gipangulohan ni Kapitan Joe Navarro ug sa Cogon-Pardo nga gidumalani Eugenio Gabuya.

 “Dili partido maoy nagpili sa mga opisyales, ang nagpili kanila mao ang mga tawo. Bahala’g oposisyon pa ang mga opisyales apan ang mga proyekto kay alang man sa mga tawo wala kana’y problema alang kanako,” matud pa sa mayor.

 Dugang pa ni Rama nga dili angayang mag-away panahon nga molingkod na ang mga napiling opisyales aron dili maapektohan ang paghatag nila og serbisyo ngadto sa ilang mga konstituwente.

Samtang ang napili nga mga opisyales sa SK gipahimangnoan usab sa mayor nga mahimong independente ug dili magpa-impluwensiya sa mga dagko.

“Ang mga dagko o ba kaha mga ginikanan sa SK, mo-guide lang na sila apan ipatigbabaw gyud ang ilang pagka-independente sa buhaton nila nga mga desisyon,” matud pa sa mayor. – BANAT NEWS