Koleksyon sa buhis misaka

CEBU, Philippines -  Ang kagamhanan sa lalawigan sa Sugbo mitumbok nga mikabat na sa dul-ang P1.5 bilyones ang nakolekta sa lalawigan sa Sugbo sa ikatulong quarter ning tuiga.

Matud pa ni provincial treasurer Roy Salubre nga anaa na sa P1.436 bilyones ang katibuk-an nilang nakolekta.

 Miingon si Salubre nga gawas sa tax revenues walay labot niini ang koleksyon gikan niadtong Enero hangtod niadtong Septembre ning tuiga sa mga balay patigayon nga gidumala sa kagamhanan sa lalawigan sama sa South Bus terminal gikan niadtong Enero hangtod sa miaging Septembre ning tuiga.

Sigun pa ni Salubre nga ang labing dako nga nakolekta sa Kapitolyo nagagikan gihapon sa mga real properties sa lalawigan sa Sugbo.

Iyang gitataw nga ang real property collection misaka og labing menus P30 milyones, itandi sa nakalabay nga katuigan nga mikabat lamang og P1.407 bilyones sa susama gihapong quarter.

Subay niini malaumon ang provincial treasurer nga makuha na usab sa lalawigan ang target collection nga P2.086 bilyones karong tuiga. 

Apan bisan pa niini nanawagan gihapon si Salubre sa mga magbubuhis sa probinsiya sa pagbayad sa ilang buhis aron dili ma-imbargo sa kagamhanan ang ilang mga propedad. Gidasig usab niya ang katawhan nga mobayad og sayo aron makapahimulos sa 10 porsento nga diskuwento.

Samtang giklaro niini nga ang Kapitolyo dili magpanuko sa pagpasaka og kaso batok sa mga magbubuhis nga magdumili sa pagbayad sa ilang buluhisan. – BANAT NEWS