Daghang SK sa LP midaog sa Tuburan

CEBU, Philippines - Mikabat sa 37 kandidato sa Sangguniang Kabataan (SK) gikan sa kinatibuk-ang 54 ka barangay nga gisuportahan sa Liberal Party (LP) ang midaog sa miaging SK election didto sa lungsod sa Tuburan, sumala ni Bise Gobernador Greg Sanchez Jr., usa sa mga opisyal sa LP dinhi sa Sugbo.

Samtang sa mga kandidato sa pagkakapitan sa barangay, may 25 ang midaog sa miaging piniliay sa barangay itandi sa 9 lang ang daang mga kapitan nga sakop sa LP.

 Matud pa ni Sanchez nga kasagaran sa mga gipildi sa mga kandidatong tinuboy ni Mayor Aljun Diamante ug sa bise gobernador , mga incumbent barangay captain nga kaalyado sa naparot nga kanhi mayor Boyet ug Rosemarie Suezo.

Sa pagkakaron may 17 nalang ka mga kapitan sa barangay didto sa maong lungsod nga nagpabiling kaalyado sa pamilyang Suezo ug ni Kongresista Pablo John Garcia apan masaligon usab ang bise gobernador nga motapon ra gihapon kini sa kampo ni Mayor Diamante sa umaabot nga mga adlaw.

Kini human makadawat og impormasyon ang bise gobernador nga ang maong mga kapitan nagpadala na og impormasyon ngadto kang Mayor Diamante bahin sa ilang laraw sa pagpasilong sa bag-ong namunoan sa lungsod.

Nunot niini gipahibawo usab ni Sanchez nga sa umaabot nga mga adlaw aduna usay pipila ka mga mayor sa kalungsoran nga mobiya na sa One Cebu Party ni Gobernador . Gwendolyn Garcia ug mohural na ubos sa LP.

Hinuon nagdumili una paghingalan ang bise gobernador niining mga mayora.

Apan nasuta karong bag-o ang pipila ka mga mayor nga gikasungi ni Garcia sama ni Mayor Malou Loot sa Daanbantayan kinsa nakigsinukli-ay og mga mahait nga pulong batok sa gobernador sa milabay’ng mga adlaw.

Samtang lakip sa gihugon -hugonang motapon sa LP mao si Mayor Teresito Marinas sa Barili human kini ikasungi ni Bise Mayor Marlon Garcia nga manghod sa gobernador.

Dugang niini giingong   ang lain usab nga motapon sa LP mao si Mayor Adelino Sitoy sa Cordova nga amahan ni Bokal Arleigh Sitoy sa sixto distrito .

Si Bokal Sitoy maoy nagbinugtong sakop sa LP diha sa hunta probinsiyal kauban ni Bise Gobernador Sanchez.  – BANAT NEWS