Usa patay, polis angol sa pinusilay

CEBU, Philippines - Usa ang patay ug naangol ang usa ka polis sa nahitabong pinusilay niadtong Martes sa gabii diha sa sitio Camp 3, barangay Jaclupan, dakbayan sa Talisay.

Wala na makaabot nga buhi ngadto sa Talisay City District Hospital si Reneboy Ancajas, 39, residente sa nahisgutang dapit human mapusili sa agtang ug sa walang bahin sa iyang dughan.

Samtang si PO2 Crisostomo Bayato nakaangkon og samad pinusilan sa tuong bitiis ug tuong kumingking sa kamot. Si Bayato uban ni PO2 Ruben Perater mga sakop sa Anti Street Hoodlum Operating Team sa Cebu City Police Office (CCPO) mag-serve unta sa nahisgutan og warrant of arrest batok nila ni Eddie Sabejon ug Willie Sabella mga residente sa barangay Buhisan, dakbayan sa Sugbo. Ang duha dunay kasong murder diha sa sala ni Regional Trial Court Judge Anacleto Caminade sa Branch 18 nga giluwatan niadto pang Abril 12, 2004. Si Bayato nga nahinabi sa mga tigbalita nagkanayon nga duna silay nadawat nga report kabahin sa nahimutangan nila ni Sabejon ug Sabella hinungdan nga ilahang giadto ang maong lugar. Si Bayato nangangkon nga usa sa mga susbject iyaha na untang nagunitan apan gipusil siya ni Ancajas ug sa maong sitwasyon nahimo niyang taming ang iyang nagunitan nga suspek.

Gawas ni Ancajas duna pay laing namusil ngadto kaniya hinungdan nga napugos siya og bawos ug nakigpinusilay na siya hinungdan nga nakaeskapo ang usa sa iyang mga nagunitang subject sa warrant nga wala niya mailhi. Samtang si Perater kinsa nagsunod daling mitabang kang Bayato ug mibawos usab og pamusil ngadto sa mga lalaking armado nga gibana-banang unom ka tawo, sumala pa niya usa sa mga lalaki nga armado og taas nga armas ang iyang napusilan apan nakadagan.

Ang Talisay City Police Station nakadawat og tawag kabahin sa maong pinusilay hinungdan nga sila si PO3 Mikie Espina, PO3 Ferdinand Pablo, PO2 Henry Mata ug PO2 Stephen Sefuesca daling miresponde sa maong report.

Na-recover sa mga polis gikan sa lugar nga nahitaboan ang usa ka kalibre .38 revolver nga dunay duha ka buhing bala, ug duha ka kabhang sa armas ug kalibre .357 revolver nga dunay upat ka buhing bala ug duha ka kabhang.

Si Supt. Henry Biñas, hepe sa TCPS sa pakighinabi niini sa Banat News kagahapon nagkanayon nga mga alas 4:45 sa hapon niadtong Martes mi-coordinate sila si Bayato ug Perater kabahin sa ilang operasyon.

Gituohan sa mga polis nga dunay laing nangaigo sa pinusilay ug gisusi na sa kapolisan ang labing duol nga mga tambalan.

Sa laing bahin, usa ka Meljun Abatayo, 33, pump operator sa Metropolitan Cebu Water District ug residente sa lugar nga paingon ngadto sa lugar nga nahitaboan dihang nakadungog og buto-buto sa armas nasikop sa mga polis tungod sa pagdala og usa ka kalibre .38 nga pusil nga dunay upat ka mga buhing bala ug usa ka kabhang.

Si Sr. Insp. Bonifacio Garciano, hepe sa Theft and Robbery Section (TRS) sa Cebu City Police Ofice (CCPO) nagkanayon nga walay nalapas ang iyang mga sakop sanglit lehitimo ang maong operasyon.

Matud pa niya napugos nalang pagbawos ang iyang mga sakop sanglit nameligro naman ang ilang kaugalingon.   - Brenda Batuto, Rey Pasaporte ug Ryss Marie Cabando (BANAT NEWS)