Gi-gangrape sa tulisan

CEBU, Philippines - Usa ka dalaga nga nagtrabaho sa usa ka mall sa dakbayan sa Sugbo nga padulong untang mangalag-kalag uban sa iyang mga paryente diha sa dakbayan sa Lapulapu ang gitabangan og lugos sa upat ka mga tulisan niadtong Nobiyembre 1 sa tungang gabii.

Ang insidente nahitabo diha sa skywalk sa barangay Pajo atubangan sa usa ka dakong mall sa maong dapit apan giingong mingaw niadtong tungora ug ngitngit ang palibot samtang nagpunay og bunok ang uwan nianang tungura.

Ang biktima kansang pangalan gipugngan sa Banat News alang sa iyang proteksyon nagpangidaron og 28-anyos ug nagtrabaho sa usa ka kompanya apan giingong nagpuyo sa dakbayan sa Sugbu.

Usa sa mga gipasanginlang mitulis ug milugos sa biktima ang nadakpan nga giilang si Christopher Antig, 18, taga barangay Pusok sa samang dakbayan.

Si Antig positibong giila sa biktima human mapakita kaniya ang rogues gallery sa mga notadong tulisan sa maong lugar samtang giila usab ang kauban niini nga mao sila si Jardin Rex alyas Alok Canales, Ryan Lesera Ramirez ug usa ka Junel Oyao Abendan alyas Yeye.

Ang dalaga sumala pa ni Insp. William Humoc sa Theft and Robbery Section sa Lapulapu City Police Office padulong ang biktima sa balay sa iyang ig-agaw aron mangalag-kalag.

Si Sr. Supt. Mariano Natuel, direktor sa Lapulapu City Police Office nga nahinabi sa Banat News  nagkanayon nga ang joint operation nila ni Inspector William Humoc, hepe sa Theft and Robbery Section (TRS) ug mga sakop sa Special Weapon and Tactics (SWAT) ang nakadakop kang Antig. Matud pang Natuel nag-inusara ra ang biktima nga misaka sa maong skywalk ug naatlan nga nag-estambay ang upat diha sa ibabaw ug misugat kini kaniya dayong tion og armas ug mideklarar og tulis.

Sumala pang Natuel gikuha sa mga suspetsado ang P500 nga salapi sa biktima ug mahalon nga cellphone apan wala pa gyud matagbaw gitabangan nila kini paglugos pinaagi sa pagpatuwad sa biktima diha sa skywalk ug aron dili makasinggit gipaum-om ang baba niini sa armas.

Human niini daling mibiya ang mga suspetsado ug ang biktima midangop sa ilang buhatan sa pagpangayo og panabang.

Si Natuel miingon nga ngitngit ang ibabaw nga bahin sa skywalk maoy hinungdan nga dili kini makita sa ubos bisan kun daghan pang mga sakyanan nga molabay sa maong lugar. – BANAT NEWS