Bakeshop gilungkab

CEBU, Philippines - Nawad-an sa halin ang Julies Bakeshop sa barangay Poblacion Occidental sa lungsod sa Consolacion human kini lungkaba sa wala hiilhing kawatan sa miaging gabii.

Si Glenda Echavaarie, 33, nga taga Sac 1,   barangay Buaya sa dakbayan sa Lapulapu ug supervisor sa nahisgotang panaderiya midangop sa kapolisan sa lungsod human madiskubrehe ang maong pagpanglungkab.

Matud pa ni PO2 Joevani Mabano sa kapolisan sa maong lungsod nga nahinabi sa Banat News nga nakahigayon sa pagsulod ang mga kawatan pinaagi sa paglubag sa mga kabilya sa bongbong niini.

Dugang pa niya nga dihang didto na sa sulod gipugos pag-abli ang usa ka kaha nga maoy gisudlan sa salapi nga gibanabanang mokabat sa P3,500 nga halin sa dayon na nilang panira sa miaging gabii.

Si PO2 Mabano miingon nga nagpadayon pa ang ilang pakisusi ug pagpaniid aron sa pag-ila sa kawatan.  – BANAT NEWS