Indian nangumot og sampot priso

CEBU, Philippines - Nagtingkagol sa Talisay City detention cell ang usa ka Indian national human kini pasanginli sa usa ka 21-anyos nga dalaga nga mihikap ug mikumot sa iyang sampot samtang nangaligo sila niadtong Martes sa gabii sa usa ka beach resort sa barangay Biasong, dakbayan sa Talisay.

Ang suspetsado mao si Sandep Kumar, 24, ulitawo, temporaryong nagpuyo sa VIP Village, San Roque, Inayawan, dakbayan sa Sugbo.

Ang dalaga kinsa residente sa barangay Tabunok, dakbayan sa Talisay uban sa iyang mga paryente , miadto sa Talisay City Police Station ug miduso og reklamo batok ni Kumar.

Si Marites Garcia, informed desk officer sa nahisgutang beach resort maoy mitawag sa TCPS ug nangayo og panabang sa mga polis bahin sa maong hitabo.

Sila si PO3 Ferdinand Pablo, PO3 Mikie Espina, PO2 Henry Mata ug PO2 Stephen Sefuesca daling mitubag sa maong alarma ug gisikop nila si Kumar.

Ang biktima mipasangil kang Kumar nga nakainom ug miduol lang kini ngadto kaniya dayong hikap ug kumot sa iyang sampot.  – BANAT NEWS