Retiradong heneral gipusil didto sa Ormoc

ORMOC CITY, Philippines –– Usa ka retiradong heneral sa pulis gipusil sa duha ka wa mailhing mga lalaki nga nagsakay og motorsiklo.

Si Ret. Psupt. Edwin Pfleider, uban sa iyang asawa nagsakay sa gipanag-iyang Mitsubishi Pajero, plate # XPW 850, nga gimaneho ni Arnold Ferolino sa dihang nahitabo ang pagpamusil mga 3:45 sa hapon niadtong Oktubre 31.

Matod ni PSInsp. Manny E. Israel, hepe sa Police Station 1 ning syudad, sa dihang gihinabi sa The Freeman / Banat News nga nakasulod na sa Ormoc City ang sakyanan ni Pfleider sa dihang may usa ka itom, walay plaka ug susama na sa kalabera nga motorsiklo ang mikalit pag-overtake kanila. Sa dihang nagkatungod na ang duha ka mga sakyanan, kalit nga gipusil sa nagsakay sa motor sila si Pfleider. Ang unang bala miigo sa walang pultahan sa Pajero ug ang ikaduha sa walang headlight niini.

“Base sa among imbestigasyon, ang mipusil nag-jacket og itom nga may baseball cap ug ang nagmaneho sa motor naka-white og T-shirt. Human sa ‘drive by’ nga pagpamusil, miikyas ang duha padulong sa syudad sa Ormoc,” matud ni Israel. Gituohan usab ni Israel nga revolver ang gigamit sa pagpamusil tungod kay wala gyud nakuha nga mga basyo sa bala didto sa nahitaboan sa krimen atubangan sa St. Peter’s Funeral Home, Bgy. San Pablo nga may gilay-on nga 5 kilometros gikan sa Ormoc City.

Ning pagsulat, gihuwat pa ni Israel ang sworn affidavit ni Pfleider aron magamit sa padayon nga imbestigasyon. Wala pa usab moluwat og posibleng motibo ang hepe tungod kay gusto niya nga matan-aw una ang tanang aspeto sa kaso lakip na ang mga pangalan sa wala pa mailhing mga suspetsado.

Si Pfleider ang nabalitang gidudahan nga utok sa pagpatay sa usa ka operator sa V-hire dili pa lang dugay. – BANAT NEWS