Sekyu gisakmita'g armas ug bonet

CEBU, Philippines - Usa ka security guard kinsa nagsakay og motorsiklo unya miagi sa usa ka one way nga karsada sa pasugat nga direksyon samtang nagtangkil og armas de fuego nasikop sa kapolisan didto sa barangay Poblacion, lungsod sa Bantayan sa Bantayan Island sa miaging gabii. Ang nasikop mao si Arnold Dungog, hingkod, ug konektado sa Negrensee Security Agency, nga taga-barangay Macaban, lungsod sa Sta. Fe.

Si Dungog nasikop sa kapolisan human kini miagi sa one way road uban sa duha ka menor de edad nga miangkas kaniya sa gimaneho niyang motorsiklo nga adunay plakang YO-8300.

Sa diha nga gipahunong kini sa kapolisan gipangayoan kini og mga dokumento apan napakyas si Dungog sa pagpakita og mga papeles sa iyang sakyanan.

Samtang nasigpatan usab sa kapolisan ang usa ka kalibre .38 nga adunay duha ka buhing bala ug usa ka bonnet nga gibutang sa tool box sa maong motor busa ila kining gisakmit.

Busa ilang gisikop nila si Dungog tungod sa kalapasan niini sa Comelec Gun Ban ug paglapas usab niya sa balaod sa trapiko nga nagdili sa unsa mang sakyanan nga moagi sa one way nga karsada sa pasugat nga direksyon.

Matud pa sa hepe sa kapolisan sa lalawigan sa Sugbo, Sr. Supt. Erson Digal nga posibleng usa ka daotang tawo si Dungog tungod sa pagdala niini og bonnet, apan ila pang sutaon ang background sa iyang pagkatawo.

Midugang si Digal nga pasakaan gyud nila kini og tukmang kaso kalabot sa iyang paglapas sa Comelec gun ban.

Samtang ang duha ka menor de edad nga kuyog ni Dungog pormal usab nga gi-turn-over sa kapolisan ngadto sa Municipal Social Welfare aron maatiman usab.  – BANAT NEWS