Aktor napusilan kay way koordinasyon

CEBU, Philippines - Ang kapolisan sa dakbayan sa Talisay mihulagway nga kuwang sa coordination ang nahitabong pagpusil patay sa usa ka aktor samtang nag-shooting sa barangay Pari-an, dakbayan sa Sugbo sa miaging adlaw.

Si Superintendent Henry Biñas sa pakighinabi sa mga tigbalita kagahapon nagkanayon nga kung adunay ipahigayong shooting kinahanglan nga ang mga tagdumala niini adunay proper coordination ug magpahibawo sa kapolisan ug sa mga lokal nga opisyal sa kagamhanan sa dili pa ang shooting.

Midugang si Biñas nga kinahanglang makahibawo usab ang mga residente sa lugar nga pahigayonan sa shooting aron malikayan ang disgrasya.

Matud ni Biñas nga dili malikayan nga adunay eksina nga emotional o ba kaha may gipatay ug kuyaw kaayong adunay makakita nga usa ka tawo nga masakiton og kasing-kasing kay posibleng atakehon tungod sa kahadlok ilabi na kun magtuo kini nga tinuod ang hitabo.

Kung karambola o sinukmagay o kaha adunay gipusil sa eksina may purohan pang mosalmot sa bahugbahog ang mga tawong walay kasayoran nga shooting ang gihimo sa usa ka lugar ug malagmit madisgrasya pa ang aktor, dugang ni Biñas.

Kahinumdoman nga si Kirk Abella, usa ka lokal nga aktor kinsa konektado sa Allan Lyddiard Film nga nagbase sa London sa nasud sa Britanya gipusil patay sa usa ka tanod nga si Edgardo Cuizon, 51-anyos samtang ang biktima nagpahigayon og shooting.  – BANAT NEWS