Mitubag sa sunog nadasmag sa kahoy

CEBU, Philippines - Nadasmag sa usa ka punoan sa kahoy ug sa poste sa kuryente ang usa ka trak sa bombero sa dakbayan sa Mandaue nga miresponde sa sunog sa barangay Tawason, dakbayan sa Mandaue alas 6:45 ang takna sa miaging gabii.

Si FO3 Cefriano Codilla, imbestigador sa kabomberohan sa maong dakbayan nga nahinabi sa Banat News miingon nga nag-malfunction ang brake sa supertanker nga gipamaneho ni FO1 Keneth Dagopioso.

Gitataw niya nga dili hinuon dako ang kadaut niini gawas lang sa nangaputol nga kable sa kuryente nga nakamugna usab og brownout sa maong lugar.

Si Codilla miingon nga luwas hinuon si FO1 Dagopioso ug mihimakak sa report nga adunay naangol nga sibilyan. Apan sa report sa Maayong Buntag Kapamilya sa ABS-CBN Central Visayas kagahapon giingong adunay sibilyan nga misakay sa maong trak pagresponde ug nalagpot atol sa pagbangga.

Matud pa ni Codilla nga ilang gitubag ang alarma sa sunog sa panimalay nga gipanag-iya ni Odon Buequial nga ginama sa mixed materials.

Sumala pa niya nagsugod ang kalayo sa ikaduhang andana sa maong panimalay nga midanyos og P150 mil, samtang susihon pa usab ang report nga faulty electrical wirings o short circuit ang hinungdan niini. – BANAT NEWS