Mipatay sa aktor ikiha na

CEBU, Philippines - Pasakaan karong buntag ang tanod nga mipusil patay sa usa ka actor nga nagpahigayon og shooting sa usa ka pelikula niadtong Sabado sa gabii sa Ibarra St,. sa barangay Parian, ning dakbayan sa Sugbo.

Si Sr. Supt. Melvin Ramon Buenafe, director sa Cebu City Police Office (CCPO) nagkanayon nga kasong Reckless Imprudence Resulting to Homicide ang ilang ipasaka batok ni Edgardo Cuizon 51, nga kinse na ka tuig nga tanod sa barangay Parian.

Si Cuizon maoy mipusil patay kang Kirk Abella, nga usa ka local nga actor ug konektado sa Allan Lyddiard Film nga nagbase sa London, sa nasud sa Britanya.

Matud ni Buenafe nga ila usab ipaubos sa drug test si Cuizon sanglit nakapahibulong kaayo nila nganong gipusil ni Cuizon ang actor nga unta ni-coordinate naman ang grupo sa nag-shooting sa Parian Police Station sa wala pa sila magsugod sa ilang trabaho.

Gani ang hepe sa Parian nga si Chief Insp. Alexis Relado mipadala og lima ka polis sa lugar aron hapsay ang shooting niadtong higayona.

Giklaro ni Buenafe nga walay tulobagon ang lima ka polis sanglit sa iyang nahibaw-an gipugngan pa si Cuizon sa usa ka otoridad nga nagbantay nga dili pahilabtan ang actor kay nag-shooting kini sa pelikula.

Apan si Cuizon giingong wala maminaw sa maong pahimangno ug giduol hinuon ni Cuizon si Abella nga niadtong higayona nagsakay og motorsiklo alang sa eksina nila nga vigilante style killing.

“Mao nay amo nahibudngan nganong mi -react si Cuizon, nga unta gibadlong man siya sa polis,” matud pang Buenafe.

Samtang sa pakighinabi sa Banat News usa ka crew sa Cebu Catholic Television Netwok (CCTN) mibutyag nga wala sila maka-ila sa biktima ug dili usab kini nila artista, apan kini miangkong daghan sila og talents nga wala nila mailhi. (BANATNEWS)