Gidasmagan ni Joavan

CEBU, Philippines - Gipangita sa kapolisan ang kontrobersiyal nga sinagop sa mayor sa dakbayan sa Talisay nga si Joavan Fernandez human kini giingong mibangga sa iyang kolor green nga Pajero, nagtangag sa plakang GNZ-357 sa Innova Patrol Car sa Talisay City Police Station niadtong Domingo sa gabii diha sa Cebu South Coastal Road habig sa Rabaya Street, barangay San Roque.

Si Insp. Jose Nilo Abello nga nahinabi sa Banat News mibutyag nga ang maong insidente nahitabo pasado alas 6:00 sa gabii sa nahisgutang adlaw.

Matud niya nga si Insp. Diosdado Malazarte maoy nagmaneho sa Innova Patrol Car nga nagtangag sa plakang SJV-955 uban si Sr. Insp. Ceriaco Larrobis nga deputy chief sa TCPS.

Kauban ni Abello diha sa luyo sila si PO1 Junyl Peñaflorida ug PO1 Bernon Gelicania.

Gibutyag ni Abello nga gikan sila sa Tabunok tungod kay ilahang gikuha sila si Peñaflorida ug Gelicania ug ihatud unta nila ngadto sa sam-ang sa barangay Cansojong aron magbantay.

Pag-abot nila diha sa junction sa lugar mihunong sila diha tungod sa may balay-balay sa enforcer kay aron huwaton ang nagpadulong usab nga sakyanan diha sa ilang atbang nga moliko.

Si Joavan nga giingong luwan sa maong Pajero gikan sa dakbayan sa Sugbo nga kusog kaayong nagpadagan ug milahos og bangga diha sa pultahan nga habig sa drayber sa maong patrol car.

Sa kakusog sa pagbangga napawong ang makina sa patrolcar ug nalumping ang pultahan niini, hinuon swerteng walay bisan usa sa mga polis ang naangol.

Samtang ang walang suga sa atubangang bahin sa Pajero nabuak ug naliki ang bumper sa maong sakyanan habig usab sa wala. Matud pa ni Abello nga diriyot matuwad ang Innova tungod kay nasalta kini maong silang mga sakay sa luyo nangatapok diha sa kilid. Matud pang Malazarte nga sa iyang paglingi si Joavan ang nag-drive sa nahisgutang Pajero tungod kay giablihan niini ang bildo nga bintana sa kilid niini ug nabantayan usab niya ang marka sa plaka nga “Mayor” diha sa atubangang bahin sa Pajero.

Apan imbes nga mohunong ang sinagop sa mayor gikatahong mipahaguros hinuon kini og padagan ug diriyot pa dam-agi ang usa ka motorsiklo nga nagbiyahe usab sa nahisgutang karsada.

Tungod niini daling gipaandar ni Malazarte og balik ang patrol car aron unta gukoron ang Pajero apan mikagar ang makina hinungdan nga mikanaog si Malazarte aron unta pusilon ang ligid sa Pajero apan wala niya mabantayi nga natagak diha sulod sa Innova ang iyang pusil tungod sa kakusog sa bangga. Si Malazarte mibalik og sakay sa Innova ug gipaandar na usab niini pag-usab ang maong sakyanan ug dihang miandar dali silang migukod kang Joavan apan wala na nila kini maapsi.

Human sa maong hitabo mipahigayon ang kapolisan sa Talisay og hot pursuit operation diin giadto nila ang tanang lugar nga suroyanan ni Joavan apan wala nila makit-i ang sinagop sa mayor.

Pasado alas 10:00 sa gabii sa nahisgutang adlaw si Supt. Henry Biñas, hepe sa TCPS uban nila ni Malazarte ug Abello mianha sa Mansueto Subdivision sa barangay Bulacao sa balay ni Joavan diin nakit-an nila ang Pajero nga gigarahe.

Matud ni Biñas nga gibutyag sa asawa ni Joavan ngadto kanila nga ang maong sakyanan gidala lang kini sa drayber. Pila ka minuto ang milabay miabot si Mayor Socrates Fernandez ug gikaestorya si Biñas.

Ang mayor maoy mitunol ngadto kang Biñas sa yawe sa Pajero diin sa wala pa dalha sa mga polis ngadto sa TCPS gi-inspeksyon una nila kini atubangan ni Fernandez ug sa mga tanod.

Ang Innova patrol car gihatag kini sa siyudad ngadto sa kapolisan sa wala pa ang milabay’ng eleksiyon sa mayor niining tuiga.

Gituohan ni Biñas nga dunay kasuko kanila si Joavan tungod kay kanunay silang mopahigayon og patrolya ngadto sa Balay Alampoanan ug mag-checkpoint usab sila diha dapit sa Vista Grande Subdivision sa barangay Bulacao.

Ang maong lugar agianan paingon ngadto sa Balay Alampoanan diin giingong estambayanan ni Joavan ug sa iyang mga barkada.

Si Joavan gikatakda karong hapon (Martes) nga pasakaan og kasong malicious mischief ug direct assault diha sa Talisay City Prosecutor.

Si Biñas midugang nga ang sakyanan ni Joavan maoy ebidensiya sa hitabo ug kung wala pa ihatag sa mayor ang yawe iyaha unta kining ipaguroy.

Si Mayor Fernandez nga nakaagi dinhi sa Banat News kagahapon nagdumili sa paghatag og komento niining bag-ong kontrobersya nga nasudlan sa anak, samtang wala tubaga ni Joavan ang mga tawag sa Banat News sa iyang telepono aron unta kini kuhaan og pamahayag. Mitawag kang Mayor Fernandez ug kang Joavan aron makuhaan sila og habig kabahin sa hitabo apan kanunay maputol ang pikas linya sa telepono. (BANATNEWS)