1 patay, 1 angol sa pamusil

CEBU, Philippines -  Patay ang usa ka minor de edad nga babaye ug grabe usab ang laing minor de edad nga lalaki nga giingong sakop sa gang human gipamusil ala-una pasado ang takna sa miaging kaadlawon sa sitio Pulang Bukid sa barangay Alang-Alang, dakbayan sa Mandaue. Ang namatay mao si Jessa dela Cruz, 17, ug ang grabeng naangol mao ang 16-anyos niini nga kauban taga Purok Limonsito sa barangay Umapad sa maong dakbayan.

Si SPO3 Kerwin Bejer sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga gikan sa My Love Videoke ang mga biktima ug padulong na pauli dihang nahitabo ang pagpamusil.

Matud pa niini nga naglakaw ang duha kuyog ang ilang mga higala dihang kalit lang mitumaw ang wala hiilhing mga lalaki nga nagsakay og motorsilo gikan sa luyo ug kalit sila nga gipamusil.

Si dela Cruz naigo sa iyang dughan ug gilapsan sa bala ang lawas niini samtang ang kauban niining naangol napusilan sa iyang tiyan gikan sa wala pa matino nga kalibre sa armas. Human sa maong pagpamusil ang duha ka gikatahapan daling mipasirit sa ilang motorsilo palayo sa maong dapit. Ang mga biktima daling gidala sa ilang mga barkada ngadto sa Mandaue City District Hospital apan human sa pasiunang pagtambal dali usab kining gibalhin sa Vicente Sotto Memorial Medical Center sa dakbayan sa Sugbo apan si dela Cruz gideklarar sa mga doktor nga dead on arrival. (BANATNEWS)