Kapitan 'misukol' sa polis patay

CEBU, Philippines -  Patay na ang kontrobersyal nga barangay kapitan sa usa sa mga barangay sa lungsod sa Medellin nga gipasanginlang nalambigit sa ilegal nga drugas human kini giingong nakigpinusilay sa kapolisan nga mosikop unta kaniya kagahapon sa buntag pasado alas-11 diha sa sitio Dita sa barangay Pulangbato ning dakbayan.

Si Marianito “Manit” Yaun, 33, kanhi barangay kapitan sa Antipolo lungsod sa Medellin ang namatay pipila ka oras ang milabay diha sa North General Hospital human makaangkon og samad pinusilan sa iyang tiyan.

Sa pakighinabi sa Banat News, si Chief Insp. Romeo Santander nga nakadawat siya og taho kalabot sa duha ka armadong tawo nga naglakip kang Yaun.

Tungod niini iyang gitawgan ang kadagkuan sa Provincial Intelligence Investigation Branch aron susihon kun aduna ba silay kopya sa warrant of arrest batok ni Yaun.

Human makompirmar ug nakakuha sa kopya sa warrant of arrest sa kasong gikan sa sala ni RTC Branch 61 Judge Antonio Marigomen daling giadto sa grupo ni Santander ang dapit diin masigpati si Yaun.

Matud pa ni Santander nga uban kaniya sa pagsikop unta kang Yaun ang upat ka personnel sa PIIB uban sa ilang hepe nga si Supt. Rodulfo Albutra, upat ka sakop sa Homicide Section ug upat ka sakop sa Talamban Police Station.

Sumala pa ni Santander nga ilang nasigpatan si Yaun nga naghantak uban sa gibana-bana nga upat hangtod lima ka tawo maong ilaha unta kining giduol.

Apan giingong nakabantay kini sa mga polis ug daling mikaratel og dagan lakip na ang ubang mga naghantak hinungdan sa nahitabong ginukdanay apan sa kalit lang giingong mibunot og armas si Yaun ug mipabuto ngadto kanila si Yaun.

Wala hinuoy naigo sa mga polis ug gipadayon ang paggukod sa suspek apan subli silang gipusil ni Yaun duha ka higayon hinungdan nga mibawos na ang mga polis pagpusil kaniya.

Si Yaun pagkaigo sa tiyan daling gidala sa mga polis sa nahisgutang tambalanan apan pipila ka oras ang milabay namatay kini.

 Mipasabot si Santander nga ilang gipusil si Yaun tungod kay ila lang giprotektahan ang katawhan nga anaa sa maong lugar nga posibleng mangaigo tungod kay niadtong tungura daghang mga tawo diha sa maong lugar. (BANATNEWS)