Katawhan kinahanglang mag-ampo

CEBU, Philippines -  Gipahimangnoan sa Simbahan ang katawhan nga moobserbar sa Adlaw sa mga Santos karong adlawa ug Adlaw sa mga Minatay ugma nga ipatigbabaw ang pagkamainampuon pahinungod sa mga mitaliwan nilang mga mahal sa kinabuhi.

Ang Episcopal Vicar sa artsidiyosisi sa Sugbu Msgr. Alex Binghay sa pakighinabi sa Banat News nagkanayon nga dili adlaw karong mga panahona sa mga buhi ug dili angayang magpabadlong.

“Atong timan-an nga ang Nobiyembre 1 adlaw sa mga nangamatay nga naa na sa langit ug ang adlaw sa Nobiyembre 2 adlaw sa mga nangamatay nga naa pa sa purgatoryo,” matud pang Binghay.

Matud pa niya nga kinahanglang unahon sa mga tawo ang pag-ampo alang sa ilang mga minahal sa kinabuhi alang sa kaluwasan sa ilang mga kalag ug dili ang pagsaba-saba diha sa sam-ang ug pagpabadlong.

Giawhag usab niya ang katawhan nga respetuhon ang ubang mga tawong mangadto sa sam-ang ug likayan ang pag-inom ug pagdala og mga sound system nga makatugaw sa kamalinawon sa mga sam-ang. Samtang giklaro ni Binghay nga dili supak sa pagtulon-an sa Simbahan ang pagparosaryo o pagpapangadye sa minatay pinaagi sa mga sa manalabtan gumikan kay makatabang gihapon kini sa mga kalag.

Apan pahimangno pa niya nga ang labing taas nga matang sa pag-ampo mao ra gyud ang Santos nga Misa. Ang Simbahan adunay himuong Santos nga Misa matag oras sa tanang mga sam-ang Katoliko.

Samtang gipahimangnoan usab ni Binghay kadtong mga magpakaaron-ingnong mga pari o mga pastor nga ang katuyoan aron lang mangwarta nga magmatngon tungod kay aduna nay kasabutan ang Simbahan ug kapolisan kabahin sa buhaton kun sila masakpan.

Sumala pa niya mao kini rason nganong gi-discourage na sa artsidiyosisi ang indibidwal nga responsoryo kun ang personal nga pagpamisa sa mga indibidwal nga minatay kay naglambigit na kini og kwarta.

Matud pa niini nga ang gihimo karon sa Simbahan mao nga i-generalized o hiniusang pagpahigayon nalang og Santos nga Misa sa mga sam-ang ug ang pari gyud sa simbahan maoy motuyok aron pagbendisyon sa tanang lubnganan. (BANATNEWS)