Tigbantay sa dagat sa Talisay gi-shot gun

CEBU, Philippines - Ang mga sakop sa Fishermen Sea and Ecological Care (FISECA) sa dakbayan sa Talisay gibati og kahadlok ug midali og kanaog gikan sa fishing boat nga ilang gi-inspection human giingong gipabuthan sila og shot gun sa mga sakop sa Cordova Marine Watch kagahapon sa kaadlawon.

Base sa imbestigasyon sa kapolisan sa Talisay City Police Station nga ang F/B Robie giingong managat unta diha sa kadagatan sa Talisay sa alas 3:20 sa kadlawon apan nasakpan kini sa mga sakop sa FISECA ug gisita.

Sila si Dennis Reyes, Albert Abalo, Salvador Montaño, Alvin Crisologo, John Mark Clemen ug Enesto Rago maoy misaka sa nahisgutang fishing boat.

Ang kapitan sa maong fishing boat giila sa mga sakop sa FISECA nga si George Gonzaga kinsa uban kaniya ang 28 ka mga tripulante.

Ang sakop sa Cordova Marine Watch mao sila si Eduardo Macabudbud, Ritchie Camacho, Fred Tabel ug Miguel Ababa. Si Greg dela Torre ang hepe sa FISECA nga nahinabi sa Banat News kagahapon mibutyag nga motagak unta og pukot diha sa kadagatan sa Talisay ang maong fishing boat.

Ang maong lugar duol sa boundary sa Cordova ug Talisay apan habig pa sa Talisay ang nahimutangan sa nahisgutang bangka nga panagatan.

Matud ni dela Torre nga ilang gisita ang mga sakop sa Cordova Marine Watch (CMW) nganong gipabothan sila og shot gun sa usa sa ilang kauban.

Apan giingon nga wala kadto tuyoa kay aksidenteng nasabod ang gatilyo sa maong armas hinungdan nga mibuto kini ug maayo nalang nga didto ra sa dagat mapunta ang bala busa walay naigo.

Si Senior Inspector Felix Pacaldo mitawag sa telepono sa TCPS ug mipahibawo kabahin sa upat ka mga sakop sa CMW nga gipangulohan ni Macabudbud uban sa sakop sa FISECA nga nagsikop og fishing boat diha sa kadagatan sa Talisay.

Si dela Torre nagkanayon usab nga gikonpiska nila ang lisensiya sa kapitan ug sa mga tripulante lakip na ang rehistro sa ilang sakyanan tungod sa kalapasan nila, ang ilang illegal entry   sa kadagatan sa Talisay kansang panagat nga gamitan og pino og mata nga pukot higpit nga gidili.

Ang pinong lungag nga pukot higpit nga gidili sa balaod kini tungod kay makapuo kini sa gagmay nga mga isda.

Gibutyag ni dela Torre nga ang maong panagatan nasikop na nila sa unang higayon niadtong tuig 2008 ug ikaduha na ning higayona. (BANATNEWS)