Gibuntis sa papa

CEBU, Philippines - Nagtingkagol sa karsel ang usa ka amahan human pasanginling milugos ug mipamabdos sa iyang 11-anyos nga anak sa usa sa mga barangay sa lungsod sa Alcantara.

Ang biktima (ngalan gipugngan sa Banat News) tinun-an sa grade four giingong mabdos og lima ka bulan. Ang bata mipasangil sa iyang 38-anyos nga amahan (ngan gipugngan gihapon sa Banat News)  nagtrabaho isip usa ka drayber sa traysikad.

Ang inahan sa biktima ug ang mismong biktima maoy midangop sa buhatan sa kapolisan pasado alas-3 sa hapon ug misumbong kabahin sa maong pagpanglugos. Matud pa sa inahan ngadto sa mga polis nga ang iyang bana milugos sa iyang anak niadtong buwan sa Mayo karung tuiga ug gani tungod sa maong panghitabo namabdos ang iyang anak ug lima na kini ka bulan. Ang biktima atol sa pagsukit-sukit sa kapolisan nagkanayon nga gihadlok siya sa iyang amahan nga kun mosumbong sa bisan kinsa patyon siya niini.

Sa pakighinabi usab sa Banat News kang SPO1 Artemio Cababat kini mibutyag nga human madungog ang sumbong sa duha dali nilang giadto ang suspek ug kini ilang gidakop samtang namasahero sa iyang traysikad.

Ang kapolisan naglisod sa pagkuha og dugang mga pamahayag gikan sa bata ug sa inahan tungod kay aduna pa kini kahadlok sa suspek kinsa giingong niadto palang usab bulan sa Mayo niining tuiga nakagawas gikan sa prisuhan tungod sa kasong parricide human niini mapatay ang amahan.

Si Cababat nagtuong posibleng kaadlawon nahitabo ang pagpanglugos sanglit ilang nasayran nga mobiya matag kaadlawon ang inahan niini aron mangompra og isda nga igbabaligya. (BANATNEWS)