CEBU, Philippines - Nakaangkon og samad sa agtang ang gwardiya sa Nemeño Reach.Com Internet Café and Training Center human kini hapaka og pusil sa tulisan kagahapon sa kaadlawon diha sa barangay Tabunok, dakbayan sa Talisay.
Ang nahisgutang internet café gipanag-iya ni Ryan Nadela, 30, taga Bonanza Subdivision, barangay San Roque sa nahisgutang siyudad.
Ang gwardiya nga naangol mao si Ernie Roy Ayok, 21, taga sitio Ilang-ilang, barangay Lagtang, Talisay daling mitawag ngadto sa Talisay City Police Station ug nangayo og panabang ngadto sa mga polis.
Ang duha ka wala mailhing mga lalaki nagsakay og usa ka motorsiklo ug pulos armado og mga pusil ug gihulagway nga mga dauton og panglawas ug nagpanuigon sa 28 ug 30-anyos.
Si Insp. Hugo Rio Ipon, mibutyag sa Banat News nga ang nahisgutang mga lalaki kalit mitungha ug nagpakaaron-ingnong mga kostumer sa maong internet café apan dihang nakasikit ang usa kang Ayok gitionan kini dayon og armas dayong deklarar og tulis.
Dihang gisuwayan ni Ayok og ilog ang armas gihapak ang agtang niini sa ikaduhang tulisan dayon gikuha ang iyang service .38 revolver ug midiretso og duol sa kahero nga si Mark Joseph Augustin ug gikuha ang P1,300 nga halin. Ang mga tulisan daling misakay og balik sa motorsiklo dayon pahuguros og dagan pahilayo sa lugar. (BANATNEWS)