Linubaay 2 angol

CEBU, Philippines - Duha ka tawo ang nalandig sa tambalanan usa kanila ang grabe human nagkadinunggabay didto sa sitio Laray, barangay San Roque, dakbayan sa Talisay sa miaging Biyernes sa kaadlawon.

Ang mga biktima nailhan lang sa ngalang Dado Faran, 48- minyo, ug Eduardo Daño, managsilingan sa Laray, samtang ang suspetsado mao si Rodillo Daño, ug ang igsoon niini nga si Eduardo Daño kinsa naangol dihang gisumbalik kini og dunggab ni Faran.

Sila si PO3 Mikie Espina ug PO1 Rosauro Pasumala kinsa maoy miresponde sa maong dinunggabay mibutyag sa Banat News nga sa wala pa ang hitabo pulos hubog ang managsoong Daño ug tungod kay daan na silang nagkabangi og si Faran kinsa hubog usab niadtong higayona, nagkaabot sila ug human sa ginagmay nga estoryang pasingit misilaob dayon hangtod nga gitabangan nila og luba si Faran.

Si Faran giingong misukol ug sa ilang linayogay nakailog kini og kutsilyo ug nakabawos sa pagpanunggab nga miresulta sa pagka-igo ni Eduardo sa walang paa. Na-recover sa mga polis gikan sa lugar nga nahitaboan ang usa ka kutsilyo nga dunay gitas-ong 12 1/2 ka pulgada.

Ang duha ka mga angol gihatod dayon ngadto sa Talisay City District Hospital apan gibalhin ra usab dayon ngadto sa Vicente Sotto Memorial Medical Center sa dakbayan sa Sugbo. Apan si Eduardo kinsa layo ra sa tinai ang samad gipagawas dayon sa doctor ug gitipon kini sa iyang igsoon nga si Rodillo sa bilanggoan. (BANATNEWS)