Loot mihingalan ni Digal nga bakakon

CEBU, Philippines - Gihinganlan ni Daanbantayan Mayor Malou Loot og bakakon ang hepe sa Cebu Police Provincial Office (CPPO) nga si Sr. Supt. Erson Digal gumikan sa pagparelibo niini karong bag-o sa unom ka mga polis nga nadestino sa maong lungsod.

Kini human ibalhin ang ilang hepe nga si Sr.Insp. Laurel Almerante   ngadto sa lungsod sa Minglanilla niadtong Martes human sa barangay ug SK election. Gibutyag ni Mayor Loot nga butboton si Digal human kini mipadayag atol sa interview sa usa ka estasyonan sa radyo nga dili tinuod nga gimandoan siya ni Gobernador Gwen Garcia pagparelibo sa unom ka mga polis nga nadestino sa ilang lungsod.

Ang unom ka mga polis giingong giparelibohan human mahibaw-i ni Digal nga nag-escort kini sa mayor ug misulod sa 30 metros nga radius gikan sa presinto niadtong adlaw sa eleksiyon didto sa barangay Tapilon, sakop sa Daanbantayan.

Kini sa dihang nakakita og lalis si Mayor Loot sa usa sa mga nars nga iyang giimbargohan og camera atol sa adlaw sa eleksiyon human kini nagpatuyang og kuha og hulagway sa mayor.

Apan matud ni Mayor Loot nga wala gyuy igong basihanan ang maong reklamo tungod kay si Ret. Col. Hiram Benatiro nga nagpapili pagka kapitan sa bgy. Tapilon ug napildi, maoy nagpahaba ngadto kang Gobernador Gwen Garcia.

Matud ni Loot nga mao kini gibasihan sa gobernador pagmando kang Digal pagparelibo sa unom ka mga polis nga nadestino sa ilang lungsod. Midugang si Loot nga dili makalimod niini si Digal tungod kay gipahibawo siya niini ni Digal mismo sa milabay’ng gabii. Miingon usab siya nga lakip na ang iyang bana nga si Sr. Supt. Vicente Loot gisultihan usab ni Digal nga wala siyay mahimo gawas sa pagpatuman sa maong kamandoan.

Hinoon masaligon si Loot nga mahibalik ra og destino sa ilang lungsod ang maong mga polis human sa election ban karong Nobiyembre 10 tungod kay nakasiguro siya nga molutaw ra ang kamatuoran nga wala silay kalapasang nahimo.

Miingon si Loot nga siya rang usa ang misulod sa presinto ug wala siyay kaubang mga polis niadtong pag-adto niya sa Tapilon.

Hinuon si Digal sa iyang bahin mibutyag sa taga media nga sa wala pa ang eleksyon daan nang gitakda niya nga lahugayon ang mga hepe sa kapolisan sa tibuok lalawigan. (BANATNEWS)