CEBU, Philippines - Ang P1 bilyon nga tinuig nga gahin alang sa tuig 2011 giduso ni Mayor Paz Radaza ngadto sa konseho sa dakbayan sa Lapulapu ug gilauman nga kaaprobahan kini sa konseho.
Ang maong kantidad milabaw og P2 milyones kay sa gahin niadtong panahon pa sa iyang bana nga si kanhi Mayor Arturo Radaza kinsa kongresista na karon sa Lone District sa maong dakbayan.
Si Radaza nga nahinabi sa mga tigbalita miingon nga ang maong kantidad sa ilang tinuig nga gahin gitumong aron matuman sa hingpit ang tanang proyekto ug programa niining iyang administasyon.
Naglakip sa maong mga programa mao ang pagpalambo sa drainage system sa dakbayan nga maoy nag-una karong suliran sa maong lugar.
Gawas niini gastohanan usab ang mga panginahanglan sa pag-atiman sa maayong panglawas sa katawhan sa maong dakbayan nga gusto ni Radaza nga kahatagan sa hustong ayuda ilabi na ang mga gikinahanglang mga tambal sa masakiton.
Miingon si Radaza nga tungod sa kamahinungdanon sa mga proyekto nga iyang gitagan-an sa maong budget nagtuo siya nga dili magpanuko ang mga konsehal sa iyang dakbayan sa paglig-on sa maong gahin. (BANATNEWS)