Horror booth gibuksan

CEBU, Philippines - Gibuksan na kagahapon sa hapon ang Horror Booth sa Mandaue nga gipahiluna sa sulod sa Mandaue City Sports and Cultural Complex sa sitio Tribunal sa barangay Centro sa maong dakbayan nga nagdala sa tema nga “Kahadlok Mo Pinaskohan Ko.

Ang unang ginang sa dakbayan nga si Mrs. Sarah Cortes maoy chairman sa Mandaue Council for Children’s Protection maoy nangulo sa pagbukas sa kalihokan uban usab sa mga sakop sa Konseho nga gipangulohan ni Bise Mayor Glenn Bercede.

Naglakip sa mga kauban ni Bercede nga mitambong sa maong pagbukas mao sila si Konsehal Emmarie Lollipop Ouano Dizon, Diosdado Suico, Jimmy Lumapas, Bethoveen Andaya ug uban pa.

Si Mrs. Cortes nga nahinabi sa mga tigbalita sa press conference nga gipahigayon ang mipasabot nga ang maong kalingawan nga gipahaum sa pagsaulog sa adlaw sa mga kalag ug Todos Los Santos ang gitumong alang sa pagtigom og salapi nga maoy magamit sa Christmas Party sa kabus nga kabataan sa 27 ka barangay sa dakbayan.

Dugang pa ni Cortes nga mokabat sa 650 ka kabus nga mga bata ang makaapil sa Christmas Party karong tuiga ug minus ang maong gidaghanon sa nakasalmot sa milabay’ng tulo ka tuig nga pagpasiugda nila sa maong kalingawan.

Si Violita Cabada nga maoy City Social Welfare officer nga nahinabi sa Banat News mipasabot nga ilang gipakunhoran ang gidaghanon sa kabataan nga makasalmot sa Christmas party karong tuiga alang sa pagsiguro nga maatiman ang tanan nga mosalmot sa maong kalingawan.

Sa nasayran nga ang mosulod sa Horror Booth magbayad og tiket nga P20 ug ang tipik nga matigom maoy gamiton alang sa galastohan sa pagpakaon sa kabataan sa Christmas Party ug ingon man sa pagpamalit og mga pinaskohan. (BANATNEWS)