MCIAA giturn-over kang Villarete

CEBU, Philippines - Hingpit nang gi-turn over kagahapon ni Danilo Francia ang General Manager sa Mactan Cebu International Airport Authority (MCIAA) ang renda sa pangagamhanan sa tugpahanan sa Mactan ngadto sa bag-ong napiling general manager nga si Nigel Paul Villarete.

Atol sa gipahigayon nga MCIAA board meeting kagahapon, si Francia nagpasalamat kang Gov. Gwen Garcia ug sa tanang mga miyembro sa board sa MCIAA sa paghatag kaniya og upat ka tuig nga pagserbisyo sa tugpahanan sa Mactan. Matud pa ni Francia nga pinaagi sa pagsalig nga gihatag sa mga miyembro sa board, dako og kausaban karon ang nahisgutang airport gumikan sa iyang paningkamot.

Si Francia mipahigayon una og presentasyon sa iyang mga nahimo sa iyang paglingkod isip general manager sa wala pa ang turn over ceremony kagahapon.

Si Villarete mipasalig nga dili manghilabot sa mga kontrobersiyang isyu sa karaang mga board kay gusto siyang mahapsay ang iyang pagpadagan sa tugpahanan sa Mactan. (BANATNEWS)