Nagmotor nadasmagan lagpot angol

CEBU, Philippines - Kritikal ang kahimtang sa usa ka ulitawo human dasmagi ang iyang gimanehong motorsiklo sa   gikasugat niining sakyanan nga gimaneho og foreigner didto sa kurbadahon nga bahin sa barangay Sta. Ana sa lungsod sa Barili kagahapon sa alas 11:25 sa buntag. Ang biktima mao si Peter Dason, 18, ulitawo, nga taga barangay Patopat lungsod sa Barili. Samtang ang iyang gidasmagan mao ang Kia Pecanto nga gimaneho ni Armando Di Campobianco Sansone, 65, ulitawo, ug usa ka Italian national nga nagpuyo sa Bantayan-2, Basdiot, lungsod sa Moalboal.

Si PO3 Job Sarveda sa Barili Police mibutyag sa Banat News  nga ang Kia Pecanto gikan sa Moalboal ug paingon sa siyudad sa Sugbo ug gikasugat niini ang motorsiklo.

Apan pag-abot sa maong kurbadahun mipakusog sa pagpadagan sa iyang motor ang biktima bisan walay helmet nga gisul-ob unya tungod kay kurbada mikawat siya sa pikas lane.

Busa dihang apiki na kaayo ang Pecanto wala na siya makalikay niini nagkadinusmogay gyud sila ug gumikan kay gaan ra kaayo ang motorsiklo milupad kini ug nagbuwag sila og tugpa sa sementadong karsada,

Gumikan sa kusog nga pagkabundak niya, nabalibali ang iyang kalawasan ug nahimong tandugon ang kahimtang niini.

Gisakwat siya sa mga nakasaksi ug gihatod dayon ngadto sa Vicente Sotto Memorial Medical Center sa dakbayan sa Sugbo. (BANATNEWS)