Lazaga 'biktima' sa kahigayonan

CEBU, Philippines - Nahimong inspirasyon sa unang napasanginlang ‘bomber’ sa post-bar examination kinsa gi-clear na sa Department of Justice nga si Jed Carlo Lazaga ang kasinatian niya sa maong hitabo aron siya mopursigir nga mahimong abogado.

“Mao ni akong gihimo nga inspiration para mahimong lawyer ug aron sad makadepensa kun si kinsa man ang mapareha nako,” kini maoy gibutyag ni Lazaga, ang tinun-an sa University of San Jose Recoletos College of Law.

Si Lazaga nga sakop sa Alpha Kappa Rho fraternity bag-ohay lang gi-clear ni DOJ secretary Leila De Lima sa maong pagpamomba human mopatim-aw ang sakop sa Alpha Phi Omega fraternity nga maoy gitumbok sa National Bureau of Investigation nga suspek sa Septiyembre 26 bombing sa De La Salle University.

Usa ka press conference diha sa tunghaan sa USJR nga gitambongan kini sa dean sa college of Law Jonathan Capanas, Asst. Dean Mare Elaine Bathan, University President Rev. Fr. Enrico Peter A. Silab, OAR ug vice President for Administration Rev. Fr. Raul Buhay, OAR ug pipila ka mga magtutudlo sa College of Law ug estudyante.

Gisaysay ni Bathan nga niadtong tungura diha lang sila sa usa ka coffee shop nga adunay gilay-on nga 100 meters gikan sa nahitabo-an hinungdan nga imposible nga mamahimong suspetsado si Lazaga sa maong panghitabo.

Samtang sa bahin usab ni Lazaga mibutyag kini nga atol sa maong panghitabo pipila ka minutos ang milabay migawas siya aron iyang tapukon ang mga barista tungod sa maong pag-ulbo apan sa kalit lang siyang giduol sa mga tawo ug mikulata ug misagpa kaniya ug gikuha pa gyud ang iyang pitaka.

Gani ila kini nga gipa-blotter sa kapolisan ang iyang gidangatan sa pagtuong gipareglahan lang siya sa mga batan-on sa maong lugar apan nakugang nalang siya dihang gipasanginlan hinuon siyang suspek sa pagpamomba.

Mapasalamaton hinuon siya sa pagtangtang kaniya isip suspek sa maong hitabo ug mipasalamat sa mga kaubanan sa USJR ug sa iyang kabanay sa pagduyog sa iyang kasinatian. (Lesley Caminade ug Chester Abadilla) (BANATNEWS)