Oplan kalag-kalag ipatuman

CEBU, Philippines - Gipaniguro sa kapolisan nga kahatagan og proteksyon ang mga pasahero sa port area ug mga terminal sa Sugbo nga mopauli ngadto sa ilang mga pinuy-anan sa kalungsoran ug silingang lalawigan sa pagsaulog sa All Saints Day ug All Souls Day sa Nobiyembre 1 ug 2 niining tuiga.

Si Senior Superintendent Erson Digal, direktor sa Cebu Provincial Police Office (CPP0) mipadayag nga higpit nilang ipatuman ang Oplan Kalag-Kalag pinaagi sa pagdestino og mga polis sa mga pantalan ug mga terminal ning lalawigan.

Dugang pa niya nga sa South Bus Terminal ug North Bus Terminal destinohan usab og mga K-9 dog nga maoy mosiksik sa mga butang sa pasahero sa pagsiguro nga walay gipasukip nga bomba ug uban pang hinagiban o kaha mga ilegal nga drugas niini.

Samtang ang mga sakop sa Coast Guard dinhi   sa Sugbo mopatuman usab sa ilang higpit nga pagbantay sa mga pantalan sa Sugbo sa pagsiguro nga luwas ang mga pasahero nga mosakay sa mga barko.

Si Capt. Amelito Gabisan nga maoy tigpamaba sa Coast Guard nga nahinabi sa mga tigbalita miingon nga ilang himuon ang pagpahimutang og mga help desk station diha sa mga pantalan.

Kini maoy mahimong kadangpan sa mga pasahero nga makasinati og kakulian sa panahon sa ilang pagbiyahe.

Dugang pa niya nga mohimo usab sila og paniksik sa mga bagahe sa pasahero sa dili pa kini mosakay sa barko pinaagi sa mga K-9 dog nga ilang ipahimutang una mosakay sa barko ang mga pasahero. (BANAT)