CEBU, Philippines - Napulo ug duha ka tawo ang naangol apil na ang duha ka drayber human magkarambola ug nagdinasmagay ang lima ka mga sakyanan diin usa ka bus pasaheroan diha sa national highway sa barangay Inayagan lungsod sa Naga nagkadinasmagay kagahapon sa alas 6:45 sa buntag.
Ang lima ka sakyanan nga nagkadinasmagay mao ang Toyota Lite Ace nga gimaneho ni Joven Malinao Gutierez, 37, taga Tabok Tipolo siyudad sa Mandaue, usa ka multicab nga pasaheroan nga gimaneho ni Jesus Jr., Navales Requinto, taga Tuyan Naga, jeepney nga gimaneho ni Tommy Rago Espadilla, taga Basak Pardo sa dakbayan sa Sugbu , laing multicab nga pasaheroan nga gimaneho ni Rogelio Manacap Lasconia, taga Pangdan, Naga ug bus pasaheroan nga Sunrays nga gimaneho ni Gesim Genaro Amarado Jr., taga Sucat, Paranaque City.
Samtang ang mga naangol mao sila si Apple Requinto, Requinto Navales, 20, drayber sa multicab, Lueda Batino, 42, Onase Batino,17, Alden Jay Batino, 17, Delia Bayabas, 42, Jocelyn Repollo Algozo, Joven Malinao nga drayber sa Toyota Lite Ace, Harold Villaros, 13, Naynay Doleno Tagnan, 71, Neil Villacencio, 21 Alberto Fernandez Cabra, 20, ug Pedro Natad Reponte, 53.
Matud pa ni PO2 Ken Cabrera sa Naga Police dihang nahinabi sa Banat News ang nahisgutang mga sakyanan pulos paingon sa lungsod sa Minglanilla.
Sumala pa niini nga ang Sunrays bus nga diha sa luyo giingong maoy unang midasmag sa Toyota Lite Ace ug tungod sa kakusog sa impact mituyok ang maong sakyanan ug nadasok sa gisundang multicab hinungdan nga nagkabinanggaay ang naa sa unahan.
Kini maoy hinungdan sa pagkaangol sa mga pasahero ug sa mga drayber, hinuon luwas na ang mga pasahero atol ning pagsulat sa balita samtang ang drayber sa maong bus gibalhog na sa karsel sa kapolisan. (BANAT)