Mga kwartang gisud sa sobre narekober

CEBU, Philippines - Mga sobreng adunay sulod nga mga kwarta narekober sa kapolisan diha sa tool box sa motorsiklong nakuha diha sa crime scene sa nahitabong pinusilay diha sa barangay Punta Engaño sa dakbayan sa Lapulapu.

Si Inspector Manruf Bantog sa Investigation Detection and Management Bureau (IDMB) nga maoy nangulo sa investigating team sa kapolisan sa maong dakbayan mitug-an sa Banat News nga gisulod sa brown envelop ang maong kwarta.

Giingong ang maong sobre adunay nakasulat nga P84,200 apan ang nahibilin nga salapi nga ilang na-recover P4,100 lamang. 

Ang maong salapi nga narekober gipasa na sa kapolisan sa Lapulapu ngadto sa Criminal Investigation and Detective Group (CIDG)- 7 nga maoy nangulo sa task force nga giumol sa Police Regional Office-7.

Sumala pang Bantog lakip sa duha ka motorsiklong ilang nakuha gipanag-iya ni SPO1 Deogines Carillo nga naapil sa panag-engkwentro niadtong tungura nga miresulta sa kamatayon sa usa ka Demetrio Sumalpong ug pagkaangol sa duha ka barangay tanod nga sila si Alejandro Viloria ug Remegio Bantilo.

Dugang pa niya nga diha gisulod ang mga sobre sa tool box sa motorsiklo ug aduna na kini mga pangalan sa mga tawo.

Si Carillo sa unang pakighinabi sa mga tigbalita human kini mitahan sa CIDG-7 nangangkong self-defense ang iyang gihimo tungod kay kalit lang siyang gipaulanan og bala sa mga tanod.

Ang mga tanod nga ilang gikaengkwentro nangangkon usab nga miresponde sila sa alarma kabahin sa giingong nahitabong pagpanghakot og mga botante nga pamayran ug butangan og edilible ink ang mga tudlo. (BANAT)