CEBU, Philippines - Gipusil patay ang usa ka lalaki nga giingong sakop sa security task force sa midaog nga kapitan sa barangay Suba ning dakbayan niadtong milabay’ng eleksyon sulod sa balay niini niadtong Martes sa gabii diha sa Block 3 sitio Missionary sa nahisgutang lugar.
Ang gipusil ug namatay giila sa kapulisan mao si Nestor Cabando, 45, kanhi tanod ug giingong lider sa mga supporter sa nakadaug nga kapitan sa Suba nga si Roger Resurrecion.
Ang wala mailhing mamumuno gihulagway nga nagpangidaron 20-anyos, nagsul-ob og t-shirt nga puti ug taas ang buhok niini.
Si SPO3 Rey Cuyos sa Homicide Section nga nahinabi sa Banat News miingon nga blangko pa sila sa motibo sa maong pagpamusil apan nagduda ang mga higala ug kabanay sa biktima nga election related kini.
Ang mga imbestigador mibalik kagahapon sa buntag sa nahitaboan aron manguha og dugang impormasyon gikan sa asawa sa biktima nga si Alejandra aron makahatag kahayag sa dagan sa ilang imbestigasyon.
Sa pasiunang imbestigasyon ni Cuyos ug mga kaubanan kini mibutyag nga nanghugas og plato si Alejandra samtang ang biktima natulog niadtong higayona sulod sa ilang lawak.
Matud ni Alejandra nga nakadungog nalang siya’g masipang buto sa armas ug sa dihang iya kining gisusi iyang nakita nga nagkadugo na ang biktima diha sa ulo nga maoy nakaingon sa hinanali niining kamatayon.
Nagtuo ang asawa nga diha miagi sa luyo sa ilang balay ang mamumuno ug dayon nidiretso sa kwarto diin natulog ang biktima ug mipusil sa iyang bana. Matud sa asawa nga wala siya makatimaan nga dunay kontra iyang bana diha sa ilang lugar sanglit naninda lang kini og isda diha sa Suba.
Si Cuyos miingon nga posibleng revolver ang gigamit sa mamumuno sanglit wala silay nakuhang kabhang sa crime scene.
Si Sr. Supt. Melvin Ramon Buenafe, hepe sa Cebu City Police Office nisalikway dayon nga dunay kalambigitan ang eleksyon niadtong Lunes sanglit humana man ang piniliay.
Apan iyang giklaro nga nagpadayon gihapon ang ilang imbestigasyon sa maong hitabo aron mailhan ang responsable sa krimen ug motibo niini. (BANAT)